Moolapeta Port: మూలపేట పోర్టులో చరిత్రాత్మక ఘట్టం.. తొలిసారిగా బెర్త్కు చేరిన 'విశ్వతేజ' డ్రెడ్జర్
Studio18 News - ANDHRA PRADESH / Srikakulam : శ్రీకాకుళం జిల్లా తలరాత మార్చనున్న మూలపేట పోర్టు కార్యకలాపాలకు సిద్ధమవుతున్న వైనం నవంబరు నెలాఖరు నాటికి పోర్టు అందుబాటులోకి! శ్రీకాకుళం జిల్లా రూపురేఖలను మార్చబోయే మూలపేట పోర్టు నిర్మాణంలో ఒక చరిత్రాత్మక ఘట్టం ఆవిష్కృతమైంది. ఈ గ్రీన్ఫీల్డ్ పోర్టు ప్రాజెక్టును నిర్మిస్తున్న కాంట్రాక్టు సంస్థ విశ్వసముద్ర ఇంజనీరింగ్ ప్రైవేట్ లిమిటెడ్ కు చెందిన 'విశ్వతేజ' అనే డ్రెడ్జర్ తొలిసారిగా పోర్టు బెర్త్కు చేరుకుంది. ఈ పరిణామం, జిల్లా అభివృద్ధిలో ఒక కీలక మలుపుగా నిలవనుందని నిపుణులు అభివర్ణిస్తున్నారు. పోర్టు నిర్మాణ పనులు తుది దశకు చేరుకుని, ఇక కార్యాచరణకు సిద్ధమవుతోందనడానికి ఈ సంఘటన ఒక బలమైన సంకేతంగా నిలుస్తోంది. ఈ డ్రెడ్జర్ రాకతో పోర్టు కార్యకలాపాలకు మార్గం సుగమమైంది. శ్రీకాకుళం జిల్లా చరిత్రలో ఇది ఒక మేలి మలుపు అని, వెనుకబడిన ప్రాంత ముద్రను చెరిపేసి ఆర్థిక ప్రగతికి బాటలు వేస్తుందని భావిస్తున్నారు. ఈ పోర్టు నిర్మాణం కేవలం ఒక వాణిజ్య కేంద్రంగానే కాకుండా, ఉత్తరాంధ్ర అభివృద్ధికి ఒక గేమ్ ఛేంజర్గా మారనుంది. ఈ ప్రాజెక్టు శ్రీకాకుళం జిల్లా ఆర్థిక వ్యవస్థపై గణనీయమైన ప్రభావాన్ని చూపనుంది. ఇప్పటికే పలు దిగ్గజ సంస్థలు భారీ పెట్టుబడులతో పోర్టు సమీపంలో పరిశ్రమలు స్థాపించడానికి ఆసక్తి చూపుతున్నాయి. దీనివల్ల ప్రత్యక్షంగా, పరోక్షంగా సుమారు 35,000 నుంచి 50,000 మందికి ఉపాధి అవకాశాలు లభిస్తాయని అంచనా. ఛత్తీస్గఢ్, ఝార్ఖండ్ వంటి భూపరివేష్టిత (సముద్ర తీరం లేని) రాష్ట్రాలకు ఈ పోర్టు ఒక కీలక ఎగుమతి, దిగుమతి కేంద్రంగా మారనుంది. బొగ్గు, ఎరువులు, ఇనుప ఖనిజం వంటి భారీ సరకు రవాణాకు ఇది గేట్వేగా ఉపయోగపడనుంది. దాదాపు రూ.4,362 కోట్ల అంచనా వ్యయంతో పోర్టు నిర్మాణం జరుపుకుంటోంది. తొలి దశలో భాగంగా 23.50 మిలియన్ టన్నుల వార్షిక సామర్థ్యంతో నాలుగు బెర్తుల నిర్మాణం చేపట్టారు. 52 అడుగుల డ్రాఫ్ట్ డెప్త్తో 1,20,000 డీడబ్ల్యూటీ సామర్థ్యం ఉన్న భారీ నౌకలు సైతం ఇక్కడ లంగరు వేసేలా నిర్మాణాలు చేపడుతున్నారు. ఈ పోర్టును భోగాపురం విమానాశ్రయంతో అనుసంధానిస్తూ 200 కిలోమీటర్ల మేర గ్రీన్ఫీల్డ్ తీరప్రాంత జాతీయ రహదారిని కూడా అభివృద్ధి చేస్తున్నారు. తుపానులు, భారీ వర్షాల కారణంగా మూలపేట గ్రీన్ఫీల్డ్ పోర్టు నిర్మాణ పనుల్లో జాప్యం జరిగిందని, అందుకే గడువు పొడిగించాలని నిర్మాణ సంస్థ విశ్వసముద్ర ఇంజనీరింగ్ ప్రైవేట్ లిమిటెడ్ గతంలో ప్రభుత్వాన్ని కోరింది. కాంట్రాక్టు సంస్థ విజ్ఞప్తి మేరకు, 2026 నవంబరు 30 నాటికి ప్రాజెక్టును పూర్తి చేయాలని కొత్త గడువును నిర్దేశించింది. ఈ క్రమంలో జూన్ నాటికి పోర్టు బెర్తులను పూర్తి చేసి, నవంబరు నాటికి పూర్తి స్థాయిలో పోర్టును అందుబాటులోకి తీసుకురావాలని సంస్థ లక్ష్యంగా పెట్టుకుంది.
Admin
Studio18 News
మరిన్ని వార్తలు
Developed By :
