Bhumana Karunakar Reddy: విగ్రహం వ్యాఖ్యల వివాదం: భూమనకు అలిపిరి పోలీసుల నోటీసులు
Studio18 News - ANDHRA PRADESH / Tirupati : టీటీడీ మాజీ చైర్మన్ భూమన కరుణాకర్ రెడ్డికి 41ఏ నోటీసులు అలిపిరి విగ్రహంపై వివాదాస్పద వ్యాఖ్యల నేపథ్యంలో కేసు భక్తుల మనోభావాలు దెబ్బతిన్నాయని డిప్యూటీ ఈవో ఫిర్యాదు విచారణకు హాజరు కావాలంటూ పోలీసుల ఆదేశం వచ్చే మంగళవారం విచారణకు వస్తానని తెలిపిన భూమన తిరుమల తిరుపతి దేవస్థానం (టీటీడీ) మాజీ చైర్మన్ భూమన కరుణాకర్ రెడ్డికి పోలీసులు నోటీసులు జారీ చేశారు. తిరుపతిలోని అలిపిరి వద్ద ఒక విగ్రహం నిర్లక్ష్యానికి గురైందంటూ ఇటీవల ఆయన చేసిన వ్యాఖ్యలు వివాదాస్పదం కావడంతో నమోదైన కేసులో భాగంగా బుధవారం అలిపిరి పోలీసులు ఆయనకు 41ఏ నోటీసులు అందజేశారు. ఈ కేసు విచారణ నిమిత్తం గురువారం తిరుపతి డీఎస్పీ కార్యాలయంలో హాజరుకావాలని పోలీసులు నోటీసుల్లో పేర్కొన్నారు. అయితే, తాను కొన్ని రోజుల పాటు వ్యక్తిగత పనుల కారణంగా బిజీగా ఉంటానని భూమన కరుణాకర్ రెడ్డి పోలీసులకు తెలియజేశారు. దీనిపై స్పందించిన ఎస్ఐ అజిత, వీలు చూసుకుని విచారణకు రావాలని సూచించారు. అనంతరం, వచ్చే మంగళవారం, అంటే సెప్టెంబర్ 23వ తేదీన విచారణకు హాజరవుతానని భూమన పోలీసులకు స్పష్టం చేసినట్లు సమాచారం. కొన్ని రోజుల క్రితం అలిపిరి సమీపంలోని ఒక విగ్రహం విషయంలో భూమన చేసిన వ్యాఖ్యలు శ్రీవారి భక్తుల మనోభావాలను దెబ్బతీసేలా ఉన్నాయని తీవ్ర విమర్శలు వెల్లువెత్తాయి. ఈ వ్యవహారంపై టీటీడీ డిప్యూటీ ఈవో గోవిందరాజు అలిపిరి పోలీసులకు ఫిర్యాదు చేశారు. ఆయన ఫిర్యాదు ఆధారంగా పోలీసులు భూమనపై కేసు నమోదు చేసి, తాజాగా నోటీసులు జారీ చేశారు. ఇదిలా ఉండగా, సోషల్ మీడియాలో టీటీడీపై జరుగుతున్న దుష్ప్రచారంపై సోమవారం జరిగిన పాలకమండలి సమావేశంలో చర్చించారు. టీటీడీ ప్రతిష్ఠకు భంగం కలిగించేలా ప్రచారం చేస్తే కఠిన చర్యలు తీసుకుంటామని సంస్థ చైర్మన్ బీఆర్ నాయుడు ఈ సందర్భంగా హెచ్చరించారు.
Admin
Studio18 News
మరిన్ని వార్తలు
Developed By :
