వేతనాల జాప్యంపై మణుగూరులో కార్మికుల నల్ల నిరసన
Studio18 News - TELANGANA / HYDERABAD : వేతనాల జాప్యాన్ని నిరసిస్తూ కార్మికులు నల్ల నిరసన చేపట్టారు. మణుగూరు రైల్వే సైడింగ్లో కార్మికులు నల్ల బ్యాడ్జీలు ధరించి విధులకు హాజరయ్యారు. నెలాఖరువుతున్నా ఫిబ్రవరి జీతాలు అందలేదని ఐఎఫ్టీయూ ఆగ్రహం వ్యక్తం చేసింది. కాంట్రాక్టర్ల నిర్లక్ష్యంపై సింగరేణి యాజమాన్యం చర్యలు తీసుకోవాలని డిమాండ్ చేశారు. భద్రాద్రి కొత్తగూడెం జిల్లా, మార్చి 28: సింగరేణి కాంట్రాక్ట్ కార్మికుల వేతనాల చెల్లింపులో జాప్యాన్ని నిరసిస్తూ మణుగూరు ఏరియా రైల్వే సైడింగ్ కార్మికులు శనివారం వినూత్న నిరసన చేపట్టారు. గోదావరి లోయ బొగ్గు గని కార్మిక సంఘం (ఐఎఫ్టీయూ) పిలుపు మేరకు కార్మికులు నల్ల బ్యాడ్జీలు ధరించి విధులకు హాజరై తమ నిరసన వ్యక్తం చేశారు. తమ శ్రమకు తగ్గ ఫలితం సకాలంలో అందడం లేదని వారు ఆవేదన వ్యక్తం చేశారు. ఈ సందర్భంగా ఐఎఫ్టీయూ రాష్ట్ర ఉపాధ్యక్షుడు ఎస్.డి. నాసర్ పాషా మాట్లాడుతూ ప్రతి నెల 7వ తేదీలోపు వేతనాలు చెల్లించాలని ఆదేశాలు ఉన్నప్పటికీ, కొందరు కాంట్రాక్టర్లు వాటిని పట్టించుకోవడం లేదని ఆరోపించారు. మార్చి నెల ముగిసే సమయానికి కూడా ఫిబ్రవరి నెల జీతాలు కార్మికుల ఖాతాల్లో జమ కాలేదని తెలిపారు. వేతనాలు అందకపోవడంతో కుటుంబాలు ఆర్థిక ఇబ్బందులు ఎదుర్కొంటున్నాయని చెప్పారు. కాంట్రాక్టర్లపై యాజమాన్యం చర్యలు తీసుకోవడం లేదని ప్రశ్నిస్తూ, అధికారుల పర్యవేక్షణ లోపమే ఇందుకు కారణమని విమర్శించారు. వెంటనే పెండింగ్ వేతనాలు చెల్లించేలా చర్యలు తీసుకోవాలని, భవిష్యత్తులో ఇలాంటి సమస్యలు తలెత్తకుండా చూడాలని డిమాండ్ చేశారు. ఈ నిరసనలో ఐఎఫ్టీయూ నాయకులు కుంటా రవి, జి. నాగేశ్వరరావు, కె. వీర్రాజు, ఎం. సాంబశివరావు, కె. నాగేశ్వరరావు, ఎం. భావ్ సింగ్, రామకృష్ణ, రజబ్ అలీ తదితరులు పాల్గొన్నారు.
Admin
Studio18 News
మరిన్ని వార్తలు
Developed By :
