అటు స్టడీ టూర్లు, ఇటు ఆఫీస్ రినోవేషన్లు..! అధికారుల జల్సాలకు కేరాఫ్‌గా బల్దియా..!
Studio18 News - TELANGANA / : Gossip Garage : హాయ్ సార్ ఎలా ఉన్నారు. భలే వారు సార్ బాగున్నాం. పైగా బల్దియాలో ఉన్నాం. మాకేం ఢోకా లేదు. హ్యాపీగా టూర్‌కు వెళ్తున్నాం.. ఆఫీస్ ఎలా కావాలంటే అలా రినోవేట్ చేసుకుంటున్నాం. పైగా మంచి ఇల్లు, పెద్ద కారు, ఐఫోన్. సోలో లైఫే సో బెటర్ అన్నట్లుగా.. బల్దియానే బెటర్ అంటున్నారు ఆ ఆఫీసర్లు. సంస్థలో పైసలు లేవు కానీ.. జల్సా చేయడంలో మాత్రం కాంప్రమైజ్ అవడం లేదు. స్టడీ టూర్లు, ఆఫీస్ రిన్నోవేషన్లు అంటూ పైసలు నీళ్లలా ఖర్చు చేస్తున్నారు. ఇంతకీ బల్దియాలో ఏం జరుగుతోంది.? వచ్చిన ఆఫీసర్ వచ్చినట్లు ఇక్కడే ఎందుకు తిష్ట వేస్తున్నట్లు.? పైసలు లేకపోతే పండుగ చేసుకోవడం కష్టం. బల్దియా మాత్రం అందుకు భిన్నం. పైసలు లేక GHMC అవస్థ పడుతుంటే..రేపటి సంగతి తర్వాత..ఇప్పుడైతే ఎంజాయ్ చేయాల్సిందే అంటూ అధికారులు, కార్పొరేటర్లు ఇష్టం వచ్చినట్లు నిధులు ఖర్చు చేస్తున్నారు. ఆర్థిక కష్టాలున్నాయ్‌..లోటును భర్తీ చేసుకునే మార్గమెట్లా అని ఆలోచించాల్సింది పోయి..అటు ఆఫీసర్లు ఇటు ప్రజాప్రతినిధులు అందరూ లగ్జరీకే పెద్దపీట వేస్తున్నారు. ప్రజలను టార్చర్ పెట్టి ట్యాక్స్‌ వసూలు చేసి..తీసుకున్న అప్పుల కోసం ప్రతి రోజు కోటిన్నర రూపాయల వడ్డీ కడుతున్నా..కాందాన్ మే ఫరక్ నై ఆనా అంటున్నారు. అనుకున్నదే తడవుగా టూర్లు వేస్తున్నారు. దేశంలోని వివిధ నగరాల్లో స్టడీ టూర్ అంటూ లక్షల రూపాయలు ఖర్చు చేస్తూ ఎంజాయ్ చేస్తున్నారనే విమర్శలు ఎదుర్కొంటున్నారు. బల్దియా ఖాయా పియా చల్ దియా అనే నానుడి కంటిన్యూ అవుతుందా అంటే అవుననే చెప్పొచ్చు. అధికారులు ఒక్కసారి ఇక్కడికి వచ్చారంటే చాలు గబ్బిలం మాదిరిగా ఇక బల్దియాను వదలడం లేదు. జిల్లాలు, ఇతర డిపార్ట్ మెంట్ల నుంచి GHMCకి వచ్చిన అధికారులు..నేను పోనుపో..ఇక్కడే ఉంటా అంటూ పైరవీలతో కాలం వెల్లదీస్తున్నారు. బల్దియాకు వచ్చారంటే చాలు వెహికల్, కొత్త ఫోన్, ఇతర ఎలక్ట్రానిక్ గాడ్జెట్స్ కావాలని మంకు పట్టు పడుతున్నారట. ఇక లేటెస్ట్‌గా కార్పొరేటర్లు చేసిన స్టడీ టూర్ కోసం బల్దియా భారీగానే ఖర్చు చేసింది. ఒక్కో కార్పొరేటర్‌కు దాదాపు 69 వేల రూపాయల వరకు ఖర్చు చేసినట్లు తెలుస్తుంది. మొత్తంగా 115 మంది వరకు కార్పోరేటర్లు టూర్ కు వెళ్లారు. GHMCలోని కార్పొరేటర్లు మూడు విభాగాలుగా దేశంలోని వివిధ ప్రాంతాల్లో టూర్ కు వెళ్లారు. మేయర్ డిప్యూటీ మేయర్ల ఆధ్వర్యంలో ఈ టూర్ జరిగింది. MIM కార్పొరేటర్లు ప్రత్యేకంగా వెళ్లారు. మేయర్ బృందం యూపీ, మధ్యప్రదేశ్ రాష్ట్రాల్లో పర్యటించారు. ఇక డిప్యూటీ మేయర్ ఆధ్వర్యంలో సిక్కీంలో పర్యటించారు. అక్కడ అమలు అవుతున్న ముఖ్యమైన ప్రాజెక్టులు, శానిటేషన్, రోడ్ల నిర్వహణ ఇతర అంశాల్లో బెస్ట్ ప్రాక్టీసెస్ ను స్టడీ చేసి ఇక్కడ అమలు చేసేందుకు చర్యలు తీసుకోవాలి. గతంలో అధికారులు ప్రజాప్రతినిధులు వారి పర్యటనల్లో అధ్యయనం చేసిన వాటిని కార్పోరేషన్ పరిధిలో అమలు చేయించే వారు. కానీ ఇప్పుడు జరిగిన టూర్లతో వచ్చిందేంటో..స్టడీ చేసిందేంటో ఎవరికీ అర్థం కావడం లేదు. జస్ట్ టైంపాస్ టూర్ అంటూ అలా వెళ్లి వచ్చిన వాళ్లే కామెంట్లు చేస్తుండటాన్ని చూస్తే పరిస్థితిని అర్థం చేసుకోవచ్చు. కార్పొరేటర్ల టూర్ తో ఏం ఉపయోగమంటూ బల్దియా ఆఫీస్ లో గుసగుసలు పెట్టుకుంటున్నారు ఉద్యోగులు. కష్టకాలంలో ఉన్నప్పటికీ బల్దియాలో దుబారా పెరిగిపోయిందన్న ఆరోపణలు ఉన్నాయి. GHMC పెడుతున్న ఖర్చు కూడా చాలా వరకు వేస్ట్ ఖర్చే అంటున్నారు పబ్లిక్. టూర్ల కథ అట్లుంచితే ఇక కొంతమంది అధికారులు అయితే తమ కార్యాలయాల రిన్నోవేషన్ కు భారీగా ఖర్చులు చేయిస్తున్నారన్న ఆరోపణలున్నాయి. కిందిస్థాయి సిబ్బందికి, విజిటర్స్ కు మాత్రం కూర్చునేందుకు కుర్చీలు, టేబుల్స్ కూడా సరిగా లేని పరిస్థితి. ఉన్నతాధికారులకు సకల సౌకర్యాలు అనుభవిస్తున్నారట. గడిచిన మూడేళ్లలో GHMC హెడ్ ఆఫీస్ లో కార్యాలయాల రిన్నోవేషన్, మెయింటేనెన్స్ అంటూ కోట్లాది రూపాయలు ఖర్చు చేసినట్లు తెలుస్తుంది. ఇక జోనల్ కార్యాలయాలు, డిప్యూటీ కమిషనర్ ఆఫీసుల్లో ఎంత ఖర్చు అవుతుందో ఆ లెక్క వేరే. అధికారులు అయితే జబర్దస్తీగా బల్దియాలో బిస్తర్ వేస్తుతున్నారు. హైదరాబాద్ సిటీలో ..పైగా GHMCలో ఉద్యోగం.. అన్నింటికీ మించి మినిస్టర్ కు ఉన్నంత రాజభోగాలు. ఇంకేముందు బల్దియా అంటేనే ఆఫీసర్లకు జోర్దార్ అయిపోయింది. వచ్చామా అంటే వచ్చాం..పోయామా అంటే పోయాం..అన్ని అలవెన్సులు పొందామా అంటే పొందాం అన్నట్లుగా కొందరు అధికారులకు GHMC ఓ టూరిస్ట్ హౌజ్ అయిపోయింది. ఇక కొందరు అధికారుల అవినీతికైతే అంతే లేదన్న టాక్ ఎప్పటినుండో ఉంది. ఇటీవల జీహెచ్ ఎంసీ ఎంటమాలజీ విభాగంలో అవినీతి దుమారం రేగింది. దీనిపై కమిషనర్ అమ్రపాలి ప్రత్యేకంగా ఫోకస్ చేసి ఐదుగురు ఔట్ సోర్సింగ్ ఉద్యోగులను ఏకంగా సర్వీస్ నుంచే రిమూవ్ చేసిందంటే పరిస్థితి అర్థం చేసుకోవచ్చు. ఇక ఇదే విభాగంలో నిబంధనలకు విరుద్ధంగా తిష్టవేసిన అధికారులను సైతం రేపోమాపో శంకరగిరి మాన్యాలు పట్టించేందుకు కూడా రంగం సిద్ధం చేస్తున్నారనే టాక్ నడుస్తోంది. అయితే ఈ వ్యవహారాలను చక్కబెట్టాల్సిన రిటైర్ మెంట్ కు దగ్గరగా ఉన్న ఓ ఉన్నతాధికారే కింగ్ పిన్ గా మారి ఎంటమాలజీ విభాగాన్ని భ్రష్టు పట్టించారని సిబ్బంది చెవులు కొరుక్కుంటున్నారు. ఆయన చెప్పినట్లు చేసినందుకే తమ ఉద్యోగులు ఊడాయని ఔట్ సోర్సింగ్ ఎంప్లాయిస్ ఆవేదన వ్యక్తం చేస్తున్నారు. మొత్తానికి ఒక్కో విభాగంపై ఫోకస్ చేస్తూ కమిషనర్ అమ్రపాలి దూకుడు చూపుతుండటం.. ఇప్పుడు GHMCలో హాట్ టాపిక్ గా మారింది. ఎప్పుడు ఏ విభాగానికి ముంచుకొస్తుందో… ఎప్పుడు ఏ అధికారిపై వేటు పడుతుందోననే చర్చ జోరుగా సాగుతోంది. మరి దుబారా విషయంలో అమ్రపాలి తీరు ఎలా ఉంటుందో చూడాలి మరి..
Admin
Studio18 News
మరిన్ని వార్తలు
Developed By :
