Emergency Pill: జపాన్లో చారిత్రక నిర్ణయం.. ప్రిస్క్రిప్షన్ లేకుండానే ‘ఎమర్జెన్సీ పిల్’
Studio18 News - ఆరోగ్యం / : జపాన్లో తొలిసారిగా అత్యవసర గర్భనిరోధక మాత్రల అమ్మకానికి ఆమోదం ఇకపై డాక్టర్ ప్రిస్క్రిప్షన్ లేకుండానే ఫార్మసీల్లో విక్రయం మహిళల పునరుత్పత్తి ఆరోగ్య హక్కుల దిశగా చారిత్రక నిర్ణయం కొనుగోలుకు వయసు, తల్లిదండ్రుల అనుమతి వంటి నిబంధనలు లేవు ఏళ్ల తరబడి హక్కుల సంఘాల పోరాటంతో దిగివచ్చిన ప్రభుత్వం మహిళల ఆరోగ్య హక్కుల విషయంలో జపాన్ ప్రభుత్వం ఒక చారిత్రక నిర్ణయం తీసుకుంది. దేశంలో మొట్టమొదటిసారిగా అత్యవసర గర్భనిరోధక మాత్రలను (మార్నింగ్-ఆఫ్టర్ పిల్) డాక్టర్ ప్రిస్క్రిప్షన్ లేకుండా నేరుగా ఫార్మసీల్లో విక్రయించడానికి అనుమతి ఇచ్చింది. ఈ నిర్ణయం దేశంలోని మహిళల పునరుత్పత్తి ఆరోగ్య హక్కుల సాధనలో ఒక కీలక ముందడుగుగా భావిస్తున్నారు. ప్రముఖ ఔషధ తయారీ సంస్థ ఆస్కా ఫార్మాస్యూటికల్ తయారు చేస్తున్న 'నార్లెవో' అనే ఈ పిల్ అమ్మకాలకు ప్రభుత్వం ఆమోదముద్ర వేసింది. అయితే, దీనిని 'గైడెన్స్ అవసరమైన మందు' కేటగిరీలో చేర్చారు. అంటే, ఈ మాత్రను కొనుగోలు చేసే మహిళలు తప్పనిసరిగా ఫార్మసిస్ట్ సమక్షంలోనే దాన్ని తీసుకోవాల్సి ఉంటుంది. కాగా, ఈ పిల్ ఎప్పటి నుంచి మార్కెట్లో అందుబాటులోకి వస్తుందనే తేదీని కంపెనీ ఇంకా ప్రకటించలేదు. ఈ మాత్ర కొనుగోలుకు ఎలాంటి వయోపరిమితి గానీ, తల్లిదండ్రుల అనుమతి గానీ అవసరం లేదని అక్కడి మీడియా కథనాలు స్పష్టం చేశాయి. సురక్షితం కాని లైంగిక చర్య జరిగిన 72 గంటల్లోపు ఈ మాత్రను తీసుకుంటే గర్భం దాల్చకుండా 80 శాతం వరకు నివారించవచ్చని నిపుణులు చెబుతున్నారు. ఇది అండం పూర్తిగా అభివృద్ధి చెందకుండా లేదా గర్భాశయానికి అంటుకోకుండా నిరోధిస్తుంది. సంప్రదాయ, పితృస్వామ్య భావజాలం బలంగా ఉన్న జపాన్లో మహిళల ఆరోగ్యానికి సంబంధించిన ఔషధాలపై ఆమోదం పొందడం అంత సులభం కాదు. ప్రపంచవ్యాప్తంగా 90కి పైగా దేశాల్లో ఈ తరహా అత్యవసర గర్భనిరోధక మాత్రలు ప్రిస్క్రిప్షన్ లేకుండా లభిస్తున్నప్పటికీ, జపాన్లో మాత్రం ఇన్నేళ్లుగా దీనిపై చర్చ జరుగుతూనే ఉంది. 2017లో ఈ అంశం తొలిసారిగా ఆరోగ్య మంత్రిత్వ శాఖ ప్యానెల్ ముందుకు రాగా, దీనివల్ల బాధ్యతారహిత వినియోగం పెరుగుతుందనే ఆందోళనలతో ఆమోదం లభించలేదు. అయితే, హక్కుల సంఘాలు ఏళ్లుగా చేస్తున్న పోరాటాలు, యువతులు, అత్యాచార బాధితులు ఎదుర్కొంటున్న ఇబ్బందులను పరిగణనలోకి తీసుకున్న ప్రభుత్వం, గతేడాది ప్రయోగాత్మకంగా 145 ఫార్మసీల్లో ఈ మాత్రల అమ్మకానికి అనుమతించింది. ఆ ట్రయల్స్ విజయవంతం కావడంతో, ఆస్కా ఫార్మాస్యూటికల్ ఈ ఏడాది పూర్తిస్థాయి అనుమతుల కోసం దరఖాస్తు చేయగా, తాజాగా ప్రభుత్వం గ్రీన్ సిగ్నల్ ఇచ్చింది.
Admin
Studio18 News
మరిన్ని వార్తలు
Developed By :
