Wegovy: బరువు తగ్గించే వేగోవి మాత్ర వచ్చేసింది.. ఊబకాయ చికిత్సలో కొత్త శకం!
Studio18 News - ఆరోగ్యం / : అధిక బరువును తగ్గించే వేగోవి మాత్రకు అమెరికా ఆమోదం ఊబకాయ చికిత్సలో నోటి ద్వారా తీసుకునే తొలి GLP-1 ఔషధం ఇదే క్లినికల్ ట్రయల్స్లో 16.6 శాతం శరీర బరువు తగ్గినట్లు నిర్ధారణ భారత్లో ఇంజెక్షన్ రూపంలో ఇప్పటికే అందుబాటులోకి వేగోవి దేశంలో విడుదలకు ప్రభుత్వ నియంత్రణ సంస్థల అనుమతులు తప్పనిసరి ఊబకాయం, అధిక బరువు సమస్యలతో బాధపడేవారికి వైద్య రంగం నుంచి ఒక శుభవార్త అందింది. బరువు తగ్గించేందుకు ఇప్పటివరకు ఇంజెక్షన్ల రూపంలో అందుబాటులో ఉన్న ప్రఖ్యాత ఔషధం 'వేగోవి' (Wegovy) ఇప్పుడు మాత్ర రూపంలో రానుంది. ఫార్మా దిగ్గజం నోవో నార్డిస్క్ అభివృద్ధి చేసిన ఈ నోటి మాత్రకు అమెరికా ఫుడ్ అండ్ డ్రగ్ అడ్మినిస్ట్రేషన్ (FDA) ఆమోదం తెలిపింది. ఊబకాయం లేదా అధిక బరువుతో పాటు ఇతర ఆరోగ్య సమస్యలు ఉన్నవారిలో దీర్ఘకాలిక బరువు నియంత్రణ కోసం ఈ మాత్రను ఉపయోగించవచ్చు. రోజూ ఒకసారి వేసుకునే ఈ 25mg సెమాగ్లూటైడ్ మాత్ర, ఊబకాయ చికిత్స కోసం ఆమోదం పొందిన మొట్టమొదటి ఓరల్ GLP-1 ఔషధంగా నిలిచింది. ఒయాసిస్-4 (OASIS-4) ఫేజ్-3 క్లినికల్ ట్రయల్స్లో వచ్చిన సానుకూల ఫలితాల ఆధారంగా ఎఫ్డీఏ ఈ అనుమతులు మంజూరు చేసింది. ఈ ట్రయల్స్లో పాల్గొన్న వారు 64 వారాల్లో తమ శరీర బరువులో సగటున 16.6% కోల్పోయినట్లు నోవో నార్డిస్క్ ఒక ప్రకటనలో పేర్కొంది. ఈ ఔషధం వాడిన వారిలో వికారం, వాంతులు వంటి జీర్ణ సంబంధిత దుష్ప్రభావాలు కనిపించినప్పటికీ, అవి ఈ తరహా ఔషధాలలో సాధారణమేనని నిపుణులు తెలిపారు. భారత్లో ఊబకాయం, మధుమేహం సమస్యలు వేగంగా పెరుగుతున్న నేపథ్యంలో ఈ మాత్ర రాక కీలకంగా మారింది. దేశంలో ఇప్పటికే వేగోవి, ఓజెంపిక్ ఇంజెక్షన్లు అందుబాటులో ఉన్నాయి. అయితే, ఇంజెక్షన్ల పట్ల ఉన్న భయం, అసౌకర్యం కారణంగా చాలా మంది చికిత్సకు దూరంగా ఉంటున్నారు. ఈ నేపథ్యంలో నోటి ద్వారా తీసుకునే మాత్ర చికిత్సను మరింత సులభతరం చేయనుంది. ఎన్డీటీవీ కథనం ప్రకారం, దీనిపై డాక్టర్ మిథాల్ మాట్లాడుతూ, "భారత్లో ఊబకాయాన్ని సమర్థంగా ఎదుర్కోవడానికి ఇలాంటి నోటి మాత్ర కీలకం కాగలదు. ఇది నాణ్యమైన చికిత్సను ఎక్కువ మందికి అందుబాటులోకి తెస్తుంది. తద్వారా లక్షలాది మంది తమ బరువును నియంత్రించుకుని, దీర్ఘకాలిక ఆరోగ్య సమస్యల బారిన పడకుండా నివారించవచ్చు," అని అభిప్రాయపడ్డారు. అయితే, ఈ మాత్ర భారత్లో విడుదల కావాలంటే సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ (CDSCO) నుంచి అనుమతులు పొందాల్సి ఉంటుంది. ఆ తర్వాత ధరల నిర్ణయం, లభ్యత వంటి అంశాలపై స్పష్టత రానుంది. భారత్లో దీని విడుదల తేదీపై కంపెనీ ఇంకా ఎలాంటి అధికారిక ప్రకటన చేయలేదు.
Admin
Studio18 News
మరిన్ని వార్తలు
Developed By :
