Anshuman Kaushal: మీ పిల్లలను ఫుడ్డుతో ప్రేమించాలని చూడొద్దు... ఓ డాక్టర్ పోస్ట్ వైరల్
Studio18 News - ఆరోగ్యం / : పిల్లలపై ప్రేమను ఆహారంతో చూపించడం ఆపాలని డాక్టర్ హెచ్చరిక భారతీయ ఇళ్లలో ఆహారం భావోద్వేగ సాధనంగా మారిందని ఆందోళన ఈ అలవాటు పిల్లల జీవక్రియను నాశనం చేస్తుందని స్పష్టీకరణ టీనేజర్లలో ఫ్యాటీ లివర్, పీసీఓఎస్ కేసులు పెరగడానికి ఇదే కారణం ఇది ప్రేమ కాదు, అనారోగ్యకరమైన చర్య అని వైద్యుడి గట్టి సందేశం భారతీయ తల్లిదండ్రులు తమ పిల్లలపై ప్రేమను ఆహారం రూపంలో చూపించడం మానేయాలని, ఈ అలవాటు వారి ఆరోగ్యాన్ని తీవ్రంగా దెబ్బతీస్తోందని ప్రముఖ ఒబేసిటీ నిపుణుడు డాక్టర్ అంశుమన్ కౌశల్ గట్టిగా హెచ్చరిస్తున్నారు. పిల్లల ఆహారపు అలవాట్లపై ఆయన ఇచ్చిన సందేశం ప్రస్తుతం సోషల్ మీడియాలో వైరల్ అవుతోంది. తల్లిదండ్రులు ఉద్దేశపూర్వకంగా పిల్లల ఆరోగ్యాన్ని పాడుచేయడం లేదని, కానీ అతి ప్రేమతోనే వారికి హాని చేస్తున్నారని డాక్టర్ కౌశల్ తెలిపారు. "ఇంకా కొంచెం తిను నాన్నా", "కడుపు నిండలేదా?" వంటి మాటలు ప్రేమగా అనిపించినా, అవి పిల్లల జీవక్రియను (మెటబాలిజం) నాశనం చేస్తాయని ఆయన వివరించారు. సంతోషం, బాధ, పరీక్షలు, పండుగలు.. ఇలా ప్రతి సందర్భంలోనూ ఆహారంతోనే భావోద్వేగాలను ముడిపెట్టడం ప్రమాదకరమని అన్నారు. ఈ అలవాటు వల్ల పిల్లల శరీరంలో గ్లూకోజ్ స్థాయిలు నిరంతరం పెరిగిపోయి, ఇన్సులిన్ వ్యవస్థపై తీవ్ర ఒత్తిడి పడుతుందని డాక్టర్ కౌశల్ ఆందోళన వ్యక్తం చేశారు. దీని ఫలితంగా సహజసిద్ధమైన ఆకలి తగ్గిపోతుందని, మెదడు భావోద్వేగాలను నియంత్రించుకోవడానికి ఆహారంపైనే ఆధారపడేలా తయారవుతుందని స్పష్టం చేశారు. ఈ కారణంగానే టీనేజర్లలో ఫ్యాటీ లివర్, 16 ఏళ్లకే పీసీఓఎస్, చిన్న వయసులోనే డిప్రెషన్, ఇన్సులిన్ రెసిస్టెన్స్ వంటి సమస్యలు పెరుగుతున్నాయని పేర్కొన్నారు. "ఇది మన సంస్కృతి కాదు. ప్రేమ ముసుగులో జరుగుతున్న జీవక్రియ దుర్వినియోగం" అని ఆయన అభివర్ణించారు. తల్లిదండ్రులు పిల్లలకు ఆహారం పెట్టడంపై కాకుండా వారి సంరక్షణపై దృష్టి పెట్టాలని సూచించారు. ఆటలు, క్రమశిక్షణ, సరైన నిద్ర, కుటుంబంతో గడపడం వంటివి ప్రోత్సహించాలన్నారు. "మన పిల్లలను ప్రేమిద్దాం, కానీ ఆ ప్రేమను ఆహారంతో చూపించడం మానేద్దాం. అప్పుడే వారిని ఆరోగ్యవంతమైన పెద్దలుగా తీర్చిదిద్దగలం" అని తన సందేశాన్ని ముగించారు.
Admin
Studio18 News
మరిన్ని వార్తలు
Developed By :
