Ilayaraja: ఇప్పుడొస్తున్న పాటలపై ఇళయరాజా ఆసక్తికర వ్యాఖ్యలు
Studio18 News - లైఫ్ స్టయిల్ / : ఇప్పటి పాటలపై తీవ్ర అసంతృప్తి వ్యక్తం చేసిన ఇళయరాజా ఆ పాటలు ఎందుకు వస్తున్నాయో అర్థం కావడం లేదన్న మేస్ట్రో విజయవాడలో తొలిసారిగా సంగీత కచేరీ సందర్భంగా వ్యాఖ్యలు పాతతరం సంగీత సృష్టి విధానాన్ని గుర్తు చేసుకున్న వైనం మేల్ సింగర్ ఏం పాడారో ఫీమేల్కు తెలియడం లేదని విమర్శ ఒకప్పుడు 60 మందితో కలిసి పాటలు చేసేవాళ్లమని వెల్లడి ప్రముఖ సంగీత దర్శకుడు, ‘మేస్ట్రో’ ఇళయరాజా ప్రస్తుత తరం సంగీతంపై తీవ్ర అసంతృప్తి వ్యక్తం చేశారు. ఈ కాలంలో వస్తున్న పాటలు ఎందుకోసం వస్తున్నాయో కూడా తెలియడం లేదని ఆయన ఆవేదన వ్యక్తం చేశారు. విజయవాడలో తొలిసారిగా నవంబర్ 8న నిర్వహిస్తున్న తన సంగీత కచేరీ సందర్భంగా ఆయన మీడియాతో మాట్లాడుతూ ఈ వ్యాఖ్యలు చేశారు. తన జీవితమంతా సంగీతమయమని, తన పాటల్లో జీవం, భావోద్వేగాలు ఉంటాయని, అందుకే అవి ప్రేక్షకుల హృదయాలను తాకాయని ఇళయరాజా అన్నారు. ‘‘ఇప్పటి పాటల పరిస్థితి దారుణంగా ఉంది. ఒక మేల్ సింగర్ పాడింది, ఫీమేల్ సింగర్కు తెలియడం లేదు. వాళ్లు పాడింది వీళ్లకు తెలియదు... వీళ్లు పాడింది వాళ్లకు తెలియదు... చివరికి ఎలాంటి పాట వస్తుందో దర్శకుడికి కూడా తెలియని పరిస్థితి నెలకొంది’’ అని ఆయన విమర్శించారు. గతంలో పాటల తయారీ విధానం ఎంతో పద్ధతిగా, అందరి కృషితో జరిగేదని ఇళయరాజా గుర్తుచేసుకున్నారు. ‘‘ఒకప్పుడు 60 మంది ఆర్కెస్ట్రా ఒకేచోట కూర్చొని పాటలు కంపోజ్ చేసేవాళ్లం. రికార్డింగ్ సమయం, పాడేవాళ్లు, స్టూడియో వివరాలన్నీ కచ్చితంగా రాసుకునేవాడిని. రిహార్సల్స్ చేసి, పాట సరిగ్గా వచ్చిందని నిర్ధారించుకున్నాకే విడుదల చేసేవాళ్లం. 60 మంది ఒకేసారి శ్రమిస్తే నాలుగు నిమిషాల పాట పూర్తయ్యేది. ఇప్పుడు సంగీతకారులు కనీసం ఒక లైన్లో కూడా ఉండటం లేదు’’ అని ఆయన తన అభిప్రాయాన్ని వెల్లడించారు. తన పాటలను ఆదరిస్తున్న ప్రేక్షకులు, అభిమానులకు ఆయన ధన్యవాదాలు తెలిపారు. విజయవాడలో జరగనున్న తన కచేరీకి పెద్ద సంఖ్యలో అభిమానులు వస్తారని ఆశిస్తున్నట్లు సంతోషం వ్యక్తం చేశారు.
Admin
Studio18 News
మరిన్ని వార్తలు
Developed By :
