ఫూకెట్ నుంచి ఢిల్లీ వస్తున్న ఎయిర్ ఇండియా విమానంలో తీవ్ర ఘటనకు సంబంధించి కీలక విషయాలు వెలుగులోకి వచ్చాయి. ఆగస్టు 4న 145 మందితో ప్రయాణిస్తున్న ఏఐ-2379 విమానం ఒడిశా గగనతలంలో 36,000 అడుగుల ఎత్తులో ఉండగా మూడు హైడ్రాలిక్ వ్యవస్థలు విఫలమయ్యాయి. దీంతో విమానం ఒక్కసారిగా పైకి ఎగసి, వెంటనే కిందకు పడిపోవడంతో తీవ్ర కుదుపులు చోటుచేసుకున్నాయి. ఈ ఘటనలో 20 మంది ప్రయాణికులు, నలుగురు సిబ్బంది గాయపడ్డారు.
ఈ ఘటనపై దర్యాప్తు చేసిన ఎయిర్క్రాఫ్ట్ యాక్సిడెంట్ ఇన్వెస్టిగేషన్ బ్యూరో (AAIB) ప్రాథమిక నివేదికలో సంచలన అంశాన్ని వెల్లడించింది. విమానం పైలట్-ఇన్-కమాండ్కు నిర్వహించిన సైకోయాక్టివ్ పదార్థాల గుర్తింపు పరీక్షలో ఫలితం ‘నాన్-నెగెటివ్’గా వచ్చింది. అనంతరం నిర్వహించిన కన్ఫర్మేటరీ పరీక్షలోనూ ఇదే ఫలితం నమోదైంది. కో-పైలట్కు నిర్వహించిన రెండు పరీక్షల్లోనూ నెగెటివ్గా తేలింది.
ఈ ఫలితాల నేపథ్యంలో సంబంధిత పైలట్పై తగిన చర్యలు తీసుకోవాలని AAIB, DGCAకు సిఫార్సు చేసింది. ఈ ఘటనపై ఎయిర్ ఇండియా స్పందిస్తూ.. భద్రతకు అత్యధిక ప్రాధాన్యత ఇస్తున్నామని, నిబంధనల ఉల్లంఘనలను సహించబోమని తెలిపింది. ఘటన అనంతరం తమ పైలట్లందరికీ స్వచ్ఛందంగా డ్రగ్స్ పరీక్షలు ప్రారంభించినట్లు వెల్లడించింది. విమానంలోని సాంకేతిక, ఇతర అంశాలపై దర్యాప్తు ఇంకా కొనసాగుతోంది.
About The Author
