-
చేతికొచ్చిన పంట బూడిదవ్వడంతో లబోదిబో
-
కర్రోడా గ్రామంలో విషాదం.. ఆదుకోవాలని వేడుకోలు
, మే 01: ముధోల్ మండలంలోని కర్రోడా గ్రామంలో విద్యుత్ షార్ట్ సర్క్యూట్ కారణంగా భారీ అగ్నిప్రమాదం సంభవించింది. ఈ ప్రమాదంలో ఇద్దరు రైతులకు చెందిన సుమారు 10 ఎకరాల మొక్కజొన్న పంట పూర్తిగా అగ్నికి ఆహుతై బూడిదయ్యింది.
ప్రమాద వివరాలు
స్థానిక రైతులు తెలిపిన వివరాల ప్రకారం.. గ్రామానికి చెందిన షేకిల్ ఖాన్ తనకున్న 8 ఎకరాల్లో మొక్కజొన్న సాగు చేశారు. అలాగే సికిందర్ అలీకి చెందిన 2 ఎకరాల్లో కూడా మొక్కజొన్న పంట వేశారు. పంట కోతకు వచ్చి, చేతికి అందే సమయంలో ఒక్కసారిగా విద్యుత్ వైర్లు షార్ట్ సర్క్యూట్ కావడంతో మంటలు చెలరేగాయి.
కళ్ళముందే కాలిపోయిన శ్రమ
ఎండ తీవ్రత ఎక్కువగా ఉండటంతో మంటలు క్షణాల్లో వ్యాపించి 10 ఎకరాల పంటను చుట్టుముట్టాయి. రైతులు మంటలను ఆర్పే ప్రయత్నం చేసినప్పటికీ ఫలితం లేకుండా పోయింది. అప్పులు చేసి, ఎంతో కష్టపడి పండించిన పంట కళ్లముందే కాలి బూడిద అవ్వడంతో రైతులు కన్నీటి పర్యంతమయ్యారు. దాదాపు లక్షలాది రూపాయల నష్టం వాటిల్లిందని బాధితులు ఆవేదన వ్యక్తం చేస్తున్నారు.
ప్రభుత్వం ఆదుకోవాలని విన్నపం
పెట్టుబడి కోసం తెచ్చిన అప్పులు ఎలా తీర్చాలో తెలియక దిక్కుతోచని స్థితిలో ఉన్నామని రైతులు వాపోతున్నారు. ప్రభుత్వం మరియు జిల్లా యంత్రాంగం వెంటనే స్పందించి, క్షేత్రస్థాయిలో నష్టాన్ని అంచనా వేసి తమను ఆదుకోవాలని, నష్టపరిహారం చెల్లించి ఆదుకోవాలని బాధితులు వేడుకుంటున్నారు.
About The Author
