-
ఆర్టీసీ కార్మికుల కోరికలు తీర్చడం హర్షనీయం: జక్కిడి శివ చరణ్ రెడ్డి -
ప్రభుత్వ ఉద్యోగులతో సమానంగా ప్రయోజనాలు అందనున్నాయి
-
ఘనంగా సంబరాలు జరుపుకున్న యువజన కాంగ్రెస్, ఆర్టీసీ కార్మికులు
హయత్నగర్, ఏప్రిల్ 28 
: తెలంగాణ ఆర్టీసీ ఉద్యోగుల భద్రత, సంక్షేమం కేవలం ముఖ్యమంత్రి రేవంత్ రెడ్డితోనే సాధ్యమని తెలంగాణ యువజన కాంగ్రెస్ రాష్ట్ర అధ్యక్షులు జక్కిడి శివ చరణ్ రెడ్డి అన్నారు. ఆర్టీసీ కార్మికులు చేపట్టిన సమ్మెపై ముఖ్యమంత్రి సానుకూలంగా స్పందించి, వారి న్యాయమైన కోరికలను తీరుస్తామని హామీ ఇచ్చిన నేపథ్యంలో.. మంగళవారం హయత్నగర్ డిపో వద్ద యువజన కాంగ్రెస్ ఆధ్వర్యంలో సీఎం రేవంత్ రెడ్డి చిత్రపటానికి పాలాభిషేకం నిర్వహించారు.
38,300 మంది కార్మికులకు లబ్ధి
ఈ సందర్భంగా జక్కిడి శివ చరణ్ రెడ్డి మాట్లాడుతూ.. ముఖ్యమంత్రి తీసుకున్న చారిత్రాత్మక నిర్ణయం వల్ల రాష్ట్రంలోని 38,300 మంది ఆర్టీసీ కార్మికులు త్వరలోనే పూర్తిస్థాయి ప్రభుత్వ ఉద్యోగులుగా గుర్తింపు పొందనున్నారని తెలిపారు. వీరికి ప్రభుత్వ ఉద్యోగులతో సమానంగా పీఆర్సీ (PRC), ఉద్యోగ భద్రత మరియు రిటైర్మెంట్ ప్రయోజనాలు లభిస్తాయని పేర్కొన్నారు. గత ప్రభుత్వాల హయాంలో విస్మరణకు గురైన కార్మికులకు నేడు కాంగ్రెస్ ప్రభుత్వంలో న్యాయం జరుగుతోందని ఆయన కొనియాడారు.
సమ్మె విరమణపై హర్షం
ప్రజలకు రవాణా ఇబ్బందులు కలగకూడదనే ఉద్దేశంతో సమ్మె విరమించిన కార్మికులకు ఆయన కృతజ్ఞతలు తెలిపారు. కార్మికుల పక్షాన నిలబడిన ముఖ్యమంత్రి రేవంత్ రెడ్డికి మరియు రవాణా శాఖ మంత్రి పొన్నం ప్రభాకర్ గౌడ్ కు ప్రత్యేక ధన్యవాదాలు తెలియజేశారు. ఆర్టీసీని లాభాల బాటలో నడిపిస్తూనే, కార్మికుల సంక్షేమానికి ఈ ప్రభుత్వం కట్టుబడి ఉందని స్పష్టం చేశారు.
పాల్గొన్న నేతలు
ఈ కార్యక్రమంలో హయత్నగర్ డిపో ఆర్టీసీ ఉద్యోగులతో పాటు రంగారెడ్డి జిల్లా యువజన కాంగ్రెస్ అధ్యక్షులు నాగేందర్ రెడ్డి, ఎల్బీనగర్ అసెంబ్లీ నియోజకవర్గ అధ్యక్షులు శివ, యువజన కాంగ్రెస్ నాయకులు మరియు పెద్ద సంఖ్యలో కార్యకర్తలు పాల్గొన్నారు. ఈ సందర్భంగా డిపో పరిసరాల్లో బాణసంచా కాల్చి, మిఠాయిలు పంపిణీ చేస్తూ కాంగ్రెస్ శ్రేణులు సంబరాలు జరుపుకున్నాయి.
About The Author
