-
మూడు రోజుల పాటు అంగరంగ వైభవంగా వేడుకలు
-
భారీగా తరలివచ్చిన భక్తులు.. కొనసాగిన అన్నదాన ప్రసాదం
ధర్పల్లి, ఏప్రిల్ 24: 
నిజామాబాద్ జిల్లా ధర్పల్లి మండలం నడిమి తండా గ్రామ పంచాయతీ పరిధిలో కొలువుదీరిన శ్రీ జగదాంబ మాత, సంత్ సేవాలాల్ మహారాజ్, రామ్ రామ్ మహారాజ్ ఆలయాల 11వ వార్షికోత్సవ వేడుకలు శుక్రవారం అంగరంగ వైభవంగా ముగిశాయి. గత మూడు రోజులుగా ఆధ్యాత్మిక పరిమళాల మధ్య కొనసాగిన ఈ ఉత్సవాలకు మండలంలోని ఐదు తండాల నుండి భక్తులు భారీగా తరలివచ్చారు.
వైభవంగా యజ్ఞ హోమాదులు
ఆలయ కమిటీ మరియు గ్రామ అభివృద్ధి కమిటీ (VDC) సంయుక్త ఆధ్వర్యంలో ఈ వేడుకలను అత్యంత భక్తిశ్రద్ధలతో నిర్వహించారు. వార్షికోత్సవాల్లో భాగంగా పూజారి బలరాం నాయక్ ఆధ్వర్యంలో విశేష యజ్ఞం, హోమాలు, శాంతి పూజలు నిర్వహించారు. జగదాంబ మాతను విశేషంగా అలంకరించి, మొక్కులు చెల్లించుకున్నారు. భజనలు, కీర్తనలతో తండా ప్రాంతమంతా ఆధ్యాత్మిక శోభను సంతరించుకుంది.
అన్న ప్రసాద వితరణ
వేడుకల అనంతరం ఆలయానికి విచ్చేసిన భక్తులందరికీ కమిటీ సభ్యులు భారీ ఎత్తున అన్న ప్రసాద వితరణ చేశారు. వార్షికోత్సవం కావడంతో భక్తులు ఎండను సైతం లెక్కచేయకుండా కుటుంబ సమేతంగా వచ్చి అమ్మవారిని దర్శించుకున్నారు.
పాల్గొన్న ప్రముఖులు
ఈ కార్యక్రమంలో వీడీసీ చైర్మన్ భూక్యా బాలు నాయక్, వైస్ చైర్మన్ గోపిచాంద్, ఆలయ కమిటీ సభ్యులు రవి, బాలు, పుల్సింగ్, సీతారం, శ్రీరామ్, రిషి, కిషన్, లక్ష్మణ్ పాల్గొన్నారు. అలాగే సర్పంచ్ కేలు నాయక్, ఉప సర్పంచ్ సతీష్ నాయక్, ఐదు తండాల నాయకులు, కారబరిలు, తండా పెద్దమనుషులు మరియు భక్తులు పెద్ద సంఖ్యలో పాల్గొన్నారు.
About The Author
