డిమాండ్లు పరిష్కారం అయ్యేవరకు సమ్మె ఆగదు: ఆర్‌టీసీ జేఏసీ

గద్వాల డిపో ఎదుట కార్మికుల నిరసన
ప్రభుత్వ విలీనం, వేతన సవరణకు డిమాండ్
ముగిసిన సమ్మె సైరన్.. స్తంభించిన రవాణా

జోగులాంబ గద్వాల, ఏప్రిల్ 23: ఆర్టీసీ రక్షణ కోసం, సమస్యల సాధన కోసం తెలంగాణ రాష్ట్రవ్యాప్తంగా ఆర్టీసీ జేఏసీ ఇచ్చిన పిలుపు మేరకు గద్వాల డిపో ఎదుట కార్మికులు సమ్మె బాట పట్టారు. ఏప్రిల్ 22వ తేదీ మొదటి డ్యూటీ నుండే విధులను బహిష్కరించి, తమ న్యాయమైన డిమాండ్ల సాధనకై కార్మికులు గళమెత్తారు. జేఏసీ నాయకుల ఆధ్వర్యంలో డిపో గేటు వద్ద బైఠాయించి ప్రభుత్వానికి వ్యతిరేకంగా నినాదాలు చేశారు.

కార్మికుల ప్రధాన డిమాండ్లు ఇవే:

ప్రభుత్వంలో విలీనం: ఆర్టీసీ ఉద్యోగులను ప్రభుత్వంలో విలీనం చేసే ప్రక్రియను తక్షణమే పూర్తి చేయాలి.
వేతన సవరణ: 2021 వేతన సవరణను 30 శాతం ఫిట్‌మెంట్‌తో అమలు చేయాలి. అలాగే 2025 పీఆర్సీ ప్రక్రియను ప్రారంభించాలి.
బకాయిల చెల్లింపు: మహాలక్ష్మి పథకం కింద ప్రభుత్వం ఆర్టీసీకి చెల్లించాల్సిన రూ. 400 కోట్లను ప్రతి నెలా విడుదల చేయాలి.
ఉద్యోగ భద్రత: కారుణ్య నియామకాల (బెడ్ విన్నర్) కింద ఇచ్చే పోస్టులను పర్మినెంట్ చేయాలి.
యూనియన్ల పునరుద్ధరణ: ట్రేడ్ యూనియన్లపై ఆంక్షలు ఎత్తివేసి, గుర్తింపు సంఘం ఎన్నికలు నిర్వహించాలి.
వేధింపుల నిలిపివేత: కండక్టర్లు, డ్రైవర్లపై పనిభారం తగ్గించాలి. కేఎంపీఎల్ (KMPL), ఈపీకే (EPK) పేరుతో చేస్తున్న వేధింపులను అరికట్టాలి.
అద్దె బస్సుల జాతీయం: అద్దె బస్సులను, వాటి డ్రైవర్లను ఆర్టీసీలో విలీనం చేసుకోవాలి. కొత్త ఎలక్ట్రిక్ బస్సులను ప్రభుత్వమే కొని సంస్థకు ఇవ్వాలి.

ఖాళీల భర్తీ.. మహిళా సమస్యల పరిష్కారం

అన్ని విభాగాల్లో ఖాళీగా ఉన్న పోస్టులను భర్తీ చేయాలని, పెరిగిన రద్దీకి అనుగుణంగా బస్సుల సంఖ్యను పెంచాలని నాయకులు డిమాండ్ చేశారు. మహిళా కార్మికులు ఎదుర్కొంటున్న సమస్యలతో పాటు, రిటైరైన ఉద్యోగుల బకాయిలను వెంటనే చెల్లించాలని కోరారు. 2019 సమ్మె కాలం నాటి పోలీస్ కేసులను ఎత్తివేయాలని, గ్రేటర్ హైదరాబాద్ జోన్ సిబ్బందిని బలవంతంగా బదిలీ చేసే ఉత్తర్వులను రద్దు చేయాలని స్పష్టం చేశారు.

కార్మిక ఐక్యత వర్ధిల్లాలని, డిమాండ్లు నెరవేరే వరకు వెనక్కి తగ్గే ప్రసక్తే లేదని కార్మిక నాయకులు హెచ్చరించారు. ఈ కార్యక్రమంలో జేఏసీ నాయకులు పరమేశ్వరయ్య, భాస్కర్, ఆర్.ఎన్. రెడ్డి, ప్రసాద్, కె.వి. చారి మరియు అధిక సంఖ్యలో కార్మికులు పాల్గొన్నారు.