అణగారిన వర్గాల అభ్యున్నతికి బసవేశ్వరుడు చేసిన సేవలు అపారం: ఎమ్మెల్యే సుధీర్ రెడ్డి

వనస్థలిపురంలో ఘనంగా మహాత్మా బసవేశ్వర 893వ జయంతి ఉత్సవాలు
బసవేశ్వరుని విగ్రహానికి పూలమాలలు వేసి నివాళులు

వనస్థలిపురం, ఏప్రిల్ 20 (ప్రజా సాక్షి): సమాజంలో వేళ్లూనుకున్న కులవ్యవస్థ, వర్ణ వివక్ష మరియు లింగ వివక్షలను గట్టిగా వ్యతిరేకించిన గొప్ప అభ్యుదయవాది మహాత్మా బసవేశ్వరుడు అని ఎల్బీనగర్ ఎమ్మెల్యే దేవిరెడ్డి సుధీర్ రెడ్డి కొనియాడారు. సోమవారం వనస్థలిపురంలోని సంపూర్ణ డబుల్ బెడ్ రూమ్ నివాసాల వద్ద వనస్థలిపురం వీరశైవ లింగయత్ సమాజం అధ్యక్షులు దీపావళి శ్రవణ్ కుమార్ ఆధ్వర్యంలో నిర్వహించిన బసవేశ్వరుని 893వ జయంతి ఉత్సవాల్లో ఆయన ముఖ్య అతిథిగా పాల్గొన్నారు. ఈ సందర్భంగా బసవేశ్వరుని విగ్రహానికి పూలమాలలు వేసి ఘనంగా నివాళులర్పించారు.

ప్రధానమంత్రిగా సామాజిక సేవ

ఈ సందర్భంగా సుధీర్ రెడ్డి మాట్లాడుతూ.. బసవేశ్వరుడు 1134వ సంవత్సరంలో కర్ణాటక రాష్ట్రంలోని బాగేవాడిలో మాదిరాజు, మాదలంబిక దంపతులకు జన్మించారని తెలిపారు. వేద పండితుల కుటుంబంలో జన్మించినప్పటికీ, అణగారిన వర్గాల అభ్యున్నతి కోసం తన జీవితాన్ని అంకితం చేశారన్నారు. కళ్యాణ రాజధానిలో ప్రధానమంత్రిగా బాధ్యతలు నిర్వహిస్తూనే, సమాజ సేవలో విశేష పాత్ర పోషించిన గొప్ప వ్యక్తని కొనియాడారు.

సమసమాజ స్థాపనే లక్ష్యం

చిన్ననాటి నుంచే సామాజిక కార్యక్రమాల్లో చురుకుగా పాల్గొన్న బసవేశ్వరుడు, అంటరానితనాన్ని తీవ్రంగా వ్యతిరేకించారని ఎమ్మెల్యే గుర్తుచేశారు. వీరశైవ ధర్మాన్ని ప్రచారం చేస్తూనే, మహిళలకు సమాజంలో సమాన హక్కులు కల్పించేందుకు ఆయన చేసిన కృషి చిరస్మరణీయమని అన్నారు. నేటి తరం ఆయన ఆశయాలను స్ఫూర్తిగా తీసుకోవాలని పిలుపునిచ్చారు.

పాల్గొన్న వారు: ఈ కార్యక్రమంలో వనస్థలిపురం డివిజన్ బీఆర్ఎస్ పార్టీ అధ్యక్షులు చింతల రవికుమార్, ముద్దగొని సతీష్ కుమార్ గౌడ్, కిరణ్, వీరశైవ లింగయత్ సమాజం ప్రతినిధులు, పార్టీ నాయకులు మరియు కాలనీ ప్రజలు పెద్ద సంఖ్యలో పాల్గొన్నారు.