-
నకిలీ ఔషధాల నివారణకు దేశవ్యాప్త నిరసన
-
రెంజల్ డిప్యూటీ తహసీల్దార్కు కెమిస్ట్ అండ్ డ్రగ్గిస్ట్ అసోసియేషన్ వినతిపత్రం
రెంజల్, మే 16 
: ఆన్లైన్ ఫార్మసీల ద్వారా నిబంధనలకు విరుద్ధంగా జరుగుతున్న ఇ-ఔషధ విక్రయాలను తక్షణమే నిలిపివేయాలని, నకిలీ మందుల చలామణీని నివారించాలని డిమాండ్ చేస్తూ ఈనెల 20వ తేదీన దేశవ్యాప్తంగా మెడికల్ షాపుల బంద్కు పిలుపునిచ్చినట్లు రెంజల్ మండల కెమిస్ట్ అండ్ డ్రగ్గిస్ట్ అసోసియేషన్ అధ్యక్షులు వెంకట్ తెలిపారు. ఆల్ ఇండియా కెమిస్ట్ అండ్ డ్రగ్గిస్ట్ అసోసియేషన్ ఆదేశాల మేరకు నిజామాబాద్ జిల్లా రెంజల్ మండల కేంద్రంలో శనివారం స్థానిక డిప్యూటీ తహసీల్దార్ ప్రవీణ్, ఎంపీఓ రాజేష్, సర్పంచ్ శ్రీనివాస్, విడిసి (VDC) చైర్మన్లకు అసోసియేషన్ ప్రతినిధులు విడివిడిగా వినతిపత్రాలు అందజేశారు.
ఆన్లైన్ విక్రయాలతో రోగుల ప్రాణాలకు ముప్పు
ఈ సందర్భంగా అసోసియేషన్ అధ్యక్షులు వెంకట్ మాట్లాడుతూ.. ఎలాంటి డాక్టర్ ప్రిస్క్రిప్షన్ (వైద్యుల అనుమతి పత్రం) లేకుండా ఆన్లైన్ ప్లాట్ఫామ్ల ద్వారా మందులు విక్రయించడం వల్ల ప్రజారోగ్యానికి తీవ్ర ముప్పు వాటిల్లుతోందని ఆందోళన వ్యక్తం చేశారు. ఆన్లైన్ విక్రయాల వల్ల నకిలీ ఔషధాలు మార్కెట్లోకి వచ్చే ప్రమాదం పెరిగిందని, రోగి భద్రతకు ఎలాంటి భరోసా లేకుండా పోతోందని విమర్శించారు. నిబంధనలను తుంగలో తొక్కి కార్పొరేట్ శక్తులు సాగిస్తున్న ఈ వ్యాపార ధోరణిని అడ్డుకోవడానికి, దేశీయ ఫార్మసీ రంగాన్ని కాపాడుకోవడానికి కెమిస్టులంతా ఐక్యంగా పోరాడాల్సిన అవసరం ఉందన్నారు.
20న అత్యవసర సేవలు మినహా అన్నీ బంద్
ఈ నిరసనలో భాగంగా ఈనెల 20వ తేదీన దేశవ్యాప్తంగా, జిల్లా వ్యాప్తంగా మెడికల్ షాపులను పూర్తి స్థాయిలో బంద్ చేయనున్నట్లు స్పష్టం చేశారు. ఆన్లైన్ ఫార్మసీ విధానంపై కేంద్ర ప్రభుత్వం కఠినమైన చట్టాలు తీసుకురావాలని డిమాండ్ చేశారు.
ఈ కార్యక్రమంలో మండల కెమిస్ట్ అండ్ డ్రగ్గిస్ట్ ఉపాధ్యక్షులు దయానంద్, కార్యదర్శి మరియు ఈసీ మెంబర్ సంతోష్, మెడికల్ యూనియన్ సభ్యులు యుగంధర్, ప్రసాద్, వెంకటేష్, రజాక్, ముకేష్, సుధీర్ తదితరులు పాల్గొన్నారు.
About The Author
