31 రోజుల పాటు మజ్జిగ పంపిణీ.. తొలిరోజే 1,150 మందికి పంపిణీ
బెల్లంపల్లి, ఏప్రిల్ 25: ఎండల తీవ్రతతో అల్లాడుతున్న ప్రజలకు ఉపశమనం కలిగించేందుకు అఖిల భారత మార్వాడీ యువ మంచ్ బెల్లంపల్లి శాఖ అద్భుతమైన నిర్ణయం తీసుకుంది. నగరంలోని వివిధ ప్రాంతాల్లో నెల రోజుల పాటు (31 రోజులు) నిరంతరాయంగా మజ్జిగ పంపిణీ చేయాలని సంకల్పించింది. ఈ సేవా కార్యక్రమం శనివారం అధికారికంగా ప్రారంభమైంది.
అంబేద్కర్ చౌరస్తాలో పంపిణీ
తొలిరోజు కార్యక్రమంలో భాగంగా నగరంలోని అంబేద్కర్ కాంటా చౌరస్తా వద్ద ఉన్న హనుమాన్ ఆగ్రోస్ దుకాణం ముందు మజ్జిగ కేంద్రాన్ని ఏర్పాటు చేశారు. భానుడి భగభగలకు విలవిలలాడుతున్న బాటసారులు, కూలీలు, వాహనదారులకు సుమారు 1,150 గ్లాసుల మజ్జిగను స్వచ్ఛందంగా పంపిణీ చేశారు.
మరిన్ని సేవా కార్యక్రమాలు
ఈ సందర్భంగా యువ మంచ్ అధ్యక్షుడు కృష్ణకాంత్ సోని మాట్లాడుతూ.. పెరుగుతున్న ఉష్ణోగ్రతల దృష్ట్యా 31 రోజుల పాటు 31 కీలక ప్రదేశాలలో ఈ పంపిణీ నిర్వహిస్తామని తెలిపారు. తమ పిలుపు అందుకొని మద్దతుగా నిలిచిన దాతలకు ఆయన కృతజ్ఞతలు తెలిపారు. సమాజంలోని పెద్దల మార్గదర్శకత్వంలో భవిష్యత్తులో మరిన్ని సామాజిక సేవా కార్యక్రమాలు చేపడతామని ఆయన ఆశాభావం వ్యక్తం చేశారు.
ఈ కార్యక్రమంలో యువ మంచ్ సభ్యులు బాలు మారు, కమల్ లహోటి, అరవింద్ అగర్వాల్, రాజేంద్ర లహోటి, అజయ్ లహోటి, దినేష్ సారడా తదితరులు పాల్గొని సేవలందించారు.
About The Author
