-
కేంద్ర, రాష్ట్ర ప్రభుత్వాల వైఖరిపై మాజీ మంత్రి మండిపాటు
-
బీసీ గణనపై కాంగ్రెస్ మంత్రులే అసంతృప్తిగా ఉన్నారు
-
మండలాల వారీగా పైలెట్ ప్రాజెక్ట్ చేపట్టాలని డిమాండ్
ఆదిలాబాద్, ఏప్రిల్ 17 (ప్రజా సాక్షి): కేంద్ర మరియు రాష్ట్ర ప్రభుత్వాలు సర్వేల పేరుతో బీసీలను తీవ్రంగా అవమానపరుస్తున్నాయని మాజీ మంత్రి, బీఆర్ఎస్ జిల్లా అధ్యక్షుడు జోగు రామన్న విమర్శించారు. శుక్రవారం పట్టణంలోని బీఆర్ఎస్ పార్టీ కార్యాలయంలో ఏర్పాటు చేసిన మీడియా సమావేశంలో ఆయన మాట్లాడారు. నియోజకవర్గాల పునర్విభజన, సమగ్ర కుటుంబ సర్వేల పేరుతో బీసీలకు తీవ్ర అన్యాయం జరుగుతోందని ఆయన ఆవేదన వ్యక్తం చేశారు.
ఉపకులాల పేరుతో విభజన రాజకీయాలు
ముఖ్యమంత్రి రేవంత్ రెడ్డి ఉపకులాల సర్వే పేరుతో బీసీలను తక్కువ చేసి చూపిస్తున్నారని, ఇది ఆ వర్గాలను కించపరచడమేనని జోగు రామన్న ధ్వజమెత్తారు. ప్రధాని మోదీ, సీఎం రేవంత్ రెడ్డి ఇద్దరూ బీసీల జనాభా లెక్కల విషయంలో గోప్యత పాటిస్తూ రాజకీయ లబ్ధి కోసం ప్రయత్నిస్తున్నారని ఆరోపించారు. రాష్ట్ర ప్రభుత్వం చేపడుతున్న బీసీ సమగ్ర గణన తీరుపై స్వయంగా కాంగ్రెస్ మంత్రులే అసంతృప్తితో ఉన్నారని ఆయన గుర్తు చేశారు.
“ముఖ్యమంత్రికి బీసీలపై నిజంగా చిత్తశుద్ధి ఉంటే, ఏదైనా ఒక మండలాన్ని పైలెట్ ప్రాజెక్టుగా తీసుకుని పారదర్శకంగా సర్వే నిర్వహించాలి. అప్పుడే వాస్తవాలు వెలుగులోకి వస్తాయి.” — జోగు రామన్న, మాజీ మంత్రి
ప్రజా క్షేత్రంలో ఎండగడతాం
బీసీల హక్కులను కాలరాస్తున్న కేంద్ర, రాష్ట్ర ప్రభుత్వాల ద్వంద్వ వైఖరిని ప్రజల ముందు ఉంచుతామని ఆయన స్పష్టం చేశారు. బీసీల జనాభా ప్రాతిపదికన వారికి దక్కాల్సిన వాటాను సాధించే వరకు తమ పోరాటం ఆగదని హెచ్చరించారు.
ఈ మీడియా సమావేశంలో బీఆర్ఎస్ నాయకులు అన్నెల వసంత, దాసరి రమేష్, అశోక్ స్వామి, సేవ్వ జగదీష్, గంగయ్య, ధరవేణి రాము, కలిమ్, వెంకట్ రెడ్డి తదితరులు పాల్గొన్నారు.
About The Author
