-
ఆర్డీఓ కార్యాలయంలో వయోవృద్ధుల సమస్యలపై విచారణ
-
కొడుకులు, కోడళ్లను పిలిపించి కౌన్సెలింగ్
-
వృద్ధాప్యంలో అండగా ఉండటం ప్రాథమిక బాధ్యత
మెట్పల్లి, మే 16 
: వయోవృద్ధులైన తల్లిదండ్రులను నిర్లక్ష్యం చేసినా, వారిని సరిగ్గా పోషించకపోయినా చట్టపరమైన కఠిన చర్యలు తప్పవని మెట్పల్లి ఆర్డీఓ జి. నరసింహారావు హెచ్చరించారు. శనివారం జగిత్యాల జిల్లా మెట్పల్లి పట్టణంలోని ఆర్డీఓ కార్యాలయంలో వయోవృద్ధుల సంక్షేమ చట్టంపై ప్రత్యేక విచారణ చేపట్టారు.
కుటుంబ సభ్యులకు కౌన్సెలింగ్
తమ పిల్లలు తమను సరిగ్గా చూసుకోవడం లేదని ఫిర్యాదు చేసిన పలువురు వయోవృద్ధుల కేసులను ఆర్డీఓ పరిశీలించారు. ఈ సందర్భంగా సదరు వృద్ధుల కొడుకులు, కోడళ్లను కార్యాలయానికి పిలిపించి, వారితో ముఖాముఖి మాట్లాడారు. తల్లిదండ్రుల పట్ల బాధ్యతగా ఉండాలని, వృద్ధాప్యంలో వారికి అవసరమైన తిండి, వసతి, వైద్య సదుపాయాలు కల్పించడం చట్టరీత్యా తప్పనిసరి అని వారికి స్పష్టం చేశారు. బాధితులకు న్యాయం జరిగేలా తక్షణమే సమస్యలను పరిష్కరించారు.
చట్టం ఏం చెబుతోంది?
ఈ సందర్భంగా ఆర్డీఓ మాట్లాడుతూ.. తల్లిదండ్రులను పోషించలేని పక్షంలో ‘తల్లిదండ్రులు మరియు వయోవృద్ధుల సంరక్షణ, సంక్షేమ చట్టం’ ప్రకారం ఆస్తులను తిరిగి తీసుకోవడంతో పాటు, జరిమానా, జైలు శిక్ష పడే అవకాశం ఉంటుందని హెచ్చరించారు. ప్రతి ఒక్కరూ మానవత్వంతో వ్యవహరించి వృద్ధులకు అండగా నిలవాలని సూచించారు.
ఈ విచారణలో అడ్మినిస్ట్రేటివ్ ఆఫీసర్ (ఏఓ) విజయ లలిత, మెట్పల్లి డివిజన్ సీనియర్ సిటిజన్ అధ్యక్షులు ఒజ్జల బుచ్చిరెడ్డి, ఉపాధ్యక్షులు మదనపల్లి స్వామి, కార్యదర్శి కమలాకర్ మరియు కార్యాలయ సిబ్బంది పాల్గొన్నారు.
About The Author
