-
ఎడిస్ దోమల పట్ల ప్రజలు అప్రమత్తంగా ఉండాలి
-
ఇంటి పరిసరాల్లో నీరు నిల్వ ఉండకుండా చూసుకోవాలి: మెడికల్ ఆఫీసర్
ధర్పల్లి, మే 16 
: జాతీయ డెంగ్యూ నివారణ దినోత్సవాన్ని పురస్కరించుకొని నిజామాబాద్ జిల్లా ధర్పల్లి మండల కేంద్రంలోని స్థానిక సామాజిక ఆరోగ్య కేంద్రం (CHCenter) నందు శనివారం వైద్య సిబ్బంది ఆధ్వర్యంలో అవగాహన ర్యాలీ నిర్వహించారు. ప్రజలకు డెంగ్యూ వ్యాధి, దాని నివారణోపాయాలపై అవగాహన కల్పించేందుకు చేతుల్లో ప్లకార్డులు పట్టుకొని గ్రామ పురవీధుల గుండా నినాదాలు చేస్తూ ఈ ర్యాలీ కొనసాగింది.
పగటిపూట కుట్టే ‘ఎడిస్’ దోమలతో ప్రమాదం
ఈ సందర్భంగా మెడికల్ ఆఫీసర్ మాట్లాడుతూ.. ‘ఎడిస్’ అనే ప్రమాదకరమైన దోమ కాటు వల్లనే డెంగ్యూ వ్యాధి వ్యాపిస్తుందని తెలిపారు. ఈ దోమలు ఇళ్లలో మరియు ఇంటి పరిసరాల్లో నిల్వ ఉండే మంచినీటి నిల్వల యందు ఎక్కువగా పెరుగుతాయని వివరించారు. ముఖ్యంగా ఎడిస్ దోమలు పగటిపూట మాత్రమే కుడతాయని, ఇవి ఇళ్లలోని చీకటి మరియు చల్లటి ప్రదేశాలలో ఎక్కువగా దాక్కుంటాయని పేర్కొన్నారు.
పరిసరాల పరిశుభ్రత అత్యవసరం
ప్రజలు తమ ఇళ్లలోని కూలర్లు, పూల కుండీలు, పాత టైర్లు, డ్రమ్ములు తదితర వాటిలో నీరు నిల్వ ఉండకుండా వారానికి ఒకసారి ఖాళీ చేసి ఆరబెట్టుకోవాలని (డ్రై డే) సూచించారు. జ్వరం, ఒళ్లు నొప్పులు, కళ్ల వెనుక నొప్పి వంటి డెంగ్యూ లక్షణాలు కనిపిస్తే నిర్లక్ష్యం చేయకుండా వెంటనే ప్రభుత్వ ఆసుపత్రిని సంప్రదించి ఉచితంగా వైద్య సేవలు పొందాలన్నారు.
ఈ కార్యక్రమంలో సామాజిక ఆరోగ్య కేంద్రం వైద్య సిబ్బంది అరుణలత, పద్మ, మీనా, మురళి, సురేష్, శ్రీనివాస్, పూజ, నవీన్ మరియు ఆశా కార్యకర్తలు తదితరులు పాల్గొన్నారు.
About The Author
