-
రూ. 5,000 తక్షణ ఆర్థిక సహాయం అందజేత
-
అశ్రునయనాల మధ్య కానిస్టేబుల్ గోపాల్ సింగ్ అంత్యక్రియలు
కోయిలకొండ, ఏప్రిల్ 30: విధుల నిర్వహణలో చురుగ్గా ఉంటూ, ప్రమాద వశాత్తు అకాల మరణం చెందిన పోలీస్ కానిస్టేబుల్ కుటుంబానికి స్థానిక సర్పంచ్ అండగా నిలిచారు. మహబూబ్ నగర్ జిల్లా కోయిలకొండ మండలం ఉబ్బడి తండా (అంబ్రియా నాయక్ తండా)కు చెందిన కానిస్టేబుల్ ఎన్. గోపాల్ సింగ్ నాయక్ (తండ్రి సేవ్య నాయక్) ఈ నెల 27న జరిగిన రోడ్డు ప్రమాదంలో మరణించిన సంగతి తెలిసిందే.
బాధిత కుటుంబానికి పరామర్శ
ఈ విషాద వార్త తెలుసుకున్న గ్రామ సర్పంచ్ శ్రీ హరి సింగ్ నాయక్ బాధిత కుటుంబాన్ని స్వయంగా పరామర్శించారు. చిన్న వయసులోనే గోపాల్ సింగ్ మరణించడం గ్రామానికి తీరని లోటని ఆయన ఆవేదన వ్యక్తం చేశారు. మృతుడి తండ్రి సేవ్య నాయక్ను ఓదార్చి, దహన సంస్కార ఖర్చుల నిమిత్తం తన వంతు సహాయంగా రూ. 5,000 నగదును అందజేశారు. ప్రభుత్వం నుండి రావాల్సిన సహాయ సహకారాలు అందేలా కృషి చేస్తానని ఈ సందర్భంగా ఆయన హామీ ఇచ్చారు.
ఘనంగా నివాళులు
తండావాసుల అశ్రునయనాల మధ్య కానిస్టేబుల్ అంతిమయాత్ర కొనసాగింది. ఈ కార్యక్రమంలో గ్రామ వార్డు సభ్యులు ఎన్. నార్య నాయక్, లాలూ నాయక్ మరియు పెద్ద సంఖ్యలో గ్రామ ప్రజలు పాల్గొని మృతుడికి ఘనంగా నివాళులు అర్పించారు. ఒక క్రమశిక్షణ కలిగిన ప్రభుత్వ ఉద్యోగిని కోల్పోవడం పట్ల తండాలో విషాదఛాయలు అలుముకున్నాయి.
About The Author
