విశాఖపట్టణం (నేషనలిస్ట్ వాయిస్) ఏప్రిల్ 12 : విశాఖలోని బీజేపీ జిల్లా కార్యాలయంలో జరిగిన విలేకరుల సమావేశంలో రాష్ట్ర ఆరోగ్య శాఖ మంత్రి వై. సత్య కుమార్ యాదవ్ మాట్లాడుతూ మహిళల సాధికారతకు ఎన్డీఏ కూటమి ప్రాధాన్యతనిస్తోందని ప్రకటించారు. “నారి శక్తి వందనం” బిల్లు ద్వారా చట్టసభల్లో మహిళా ప్రాతినిధ్యాన్ని పెంచుతామని, ఈ అంశంపై ఈ నెల 17, 18 తేదీల్లో పార్లమెంటులో కీలక చర్చ జరగనుందని ఆయన వెల్లడించారు. దేశ జనాభాలో సగం ఉన్న మహిళలకు ప్రస్తుతం చట్టసభల్లో కేవలం 13 శాతం మాత్రమే ప్రాతినిధ్యం ఉందని, రిజర్వేషన్ బిల్లు అమలుతో ఈ పరిస్థితి మారుతుందని ఆశాభావం వ్యక్తం చేశారు. కేంద్ర ప్రభుత్వ పథకాలైన జనధన్, స్టార్టప్ ఇండియా వంటి కార్యక్రమాలతో మహిళలు ఇప్పటికే ఆర్థికంగా బలోపేతమయ్యారని ఆయన ఈ సందర్భంగా గుర్తుచేశారు. రాజకీయ అంశాలపై స్పందిస్తూ వైసీపీ ప్రభుత్వం భోగాపురం అభివృద్ధిని నిర్లక్ష్యం చేసిందని విమర్శించిన మంత్రి, దేశవ్యాప్తంగా ఎన్డీఏ బలపడుతోందని ధీమా వ్యక్తం చేశారు. ఈ సమావేశంలో బీజేపీ, టీడీపీ పార్టీల ముఖ్య నేతలు పాల్గొని కూటమి ఐక్యతను చాటారు.
About The Author
