విశాఖపట్టణం (నేషనలిస్ట్ వాయిస్) ఏప్రిల్ 12 : విశాఖపట్నం జిల్లా ఆనందపురం మండలం తర్లువాడలో గూగుల్ డేటా సెంటర్ స్థాపన కోసం చేపడుతున్న భూసేకరణపై సీపీఎం రాష్ట్ర కార్యదర్శి శ్రీనివాసరావు తీవ్ర ఆందోళన వ్యక్తం చేశారు. ఏప్రిల్ 28న శంకుస్థాపనకు ముహూర్తం ఖరారు చేసి 266 ఎకరాల భూమిని చదును చేస్తున్నప్పటికీ, సాగులో ఉన్న రైతులకు నేటికీ నష్టపరిహారం అందలేదని ఆయన విమర్శించారు. దళితులతో సహా అనేకమంది బాధితులకు భూమికి భూమి లేదా ఆర్థిక పరిహారం ఇస్తామన్న హామీలు అమలు కాలేదని, పర్యావరణ అధ్యయనాలు లేకుండానే ప్రాజెక్టును ముందుకు తీసుకెళ్లడం సరికాదని పేర్కొన్నారు. రైతుల పక్షాన నిలిచే నాయకులపై పోలీసు నిర్బంధాలను ఆరోపిస్తూ, పంచగ్రామాల భూ సమస్య పరిష్కరించకుండా కార్పొరేట్ సంస్థలకు భూములు ఇవ్వడాన్ని అన్యాయంగా అభివర్ణించారు. రుషికొండ భవనాలను హోటళ్లకు కాకుండా సైన్స్ సెంటర్గా మార్చాలని డిమాండ్ చేస్తూ, ఈ నెల 25లోగా రైతులకు న్యాయం చేయకపోతే పెద్ద ఎత్తున నిరసనలు చేపడతామని ఆయన హెచ్చరించారు.
About The Author
