జర్నలిస్టుల అక్రిడిటేషన్ కార్డుల గడువు జూన్ 16 వరకు పొడిగింపు: హైకోర్టు ఉత్తర్వులు

• జీవో 252, 103 సవాలు చేస్తూ దాఖలైన పిటిషన్లపై విచారణ

• వేసవి సెలవుల దృష్ట్యా గడువు పెంచుతూ నిర్ణయం

• జర్నలిస్టులకు తాత్కాలిక ఊరట

హైదరాబాద్, మే 01 : తెలంగాణ రాష్ట్రంలోని అక్రిడిటెడ్ జర్నలిస్టులకు హైకోర్టులో ఊరట లభించింది. రాష్ట్ర ప్రభుత్వం జారీ చేసిన అక్రిడిటేషన్ నిబంధనల జీవోలు (G.O. Ms. No. 252 మరియు 103) సవాలు చేస్తూ దాఖలైన పిటిషన్లను విచారించిన న్యాయస్థానం, ప్రస్తుత అక్రిడిటేషన్ కార్డుల గడువును 2026 జూన్ 16 వరకు పొడిగిస్తూ కీలక ఆదేశాలు జారీ చేసింది.

జీవోల చెల్లుబాటుపై న్యాయపోరాటం

తెలంగాణ ఉర్దూ వర్కింగ్ జర్నలిస్ట్స్ ఫెడరేషన్ సహా పలువురు జర్నలిస్టులు ప్రభుత్వం తీసుకొచ్చిన కొత్త నిబంధనలను ప్రశ్నిస్తూ హైకోర్టును ఆశ్రయించారు. పిటిషనర్ల తరఫున అడ్వకేట్ బర్కత్ అలీ ఖాన్ వాదనలు వినిపిస్తూ.. విచారణ కొనసాగుతున్నంత వరకు జర్నలిస్టులకు అందుతున్న అక్రిడిటేషన్ సదుపాయాలకు ఎలాంటి ఆటంకం కలగకుండా చూడాలని కోరారు.

ప్రభుత్వం నెల రోజులు అంటే.. కోర్టు జూన్ వరకు..

విచారణ సమయంలో స్పెషల్ అడ్వకేట్ జనరల్ స్పందిస్తూ.. ప్రభుత్వం ఇప్పటికే అక్రిడిటేషన్ కార్డుల గడువును ఒక నెల పొడిగించే యోచనలో ఉందని కోర్టుకు తెలిపారు. అయితే, ఈ గడువు వేసవి సెలవులతోనే ముగిసిపోతుందని గమనించిన హైకోర్టు, జర్నలిస్టులకు ఇబ్బందులు కలగకూడదన్న ఉద్దేశంతో గడువును జూన్ 16 వరకు పొడిగించింది. ఈ లోపు ప్రభుత్వం పూర్తి వివరాలతో కౌంటర్ అఫిడవిట్ దాఖలు చేయాలని ఆదేశించింది.

వివరాలు సమర్పించాలని ఆదేశం

జర్నలిస్టుల అక్రిడిటేషన్ కోసం వచ్చిన దరఖాస్తులు ఎన్ని? అందులో ఎన్ని ఆమోదించారు? ఎన్ని తిరస్కరించారు? తిరస్కరణకు గల కారణాలు ఏమిటి? అనే పూర్తి సమాచారాన్ని కోర్టు ముందు ఉంచాలని ఫెడరేషన్ కోరిన నేపథ్యంలో, తదుపరి విచారణలో ఈ అంశాలను పరిశీలిస్తామని కోర్టు పేర్కొంది.

సంఘాల హర్షం

కోర్టు నిర్ణయాన్ని తెలంగాణ ఉర్దూ వర్కింగ్ జర్నలిస్ట్స్ ఫెడరేషన్ ప్రధాన కార్యదర్శి సయ్యద్ ఘౌస్ మొహియుద్దీన్ స్వాగతించారు. ఇది తాత్కాలిక ఉపశమనం మాత్రమేనని, జర్నలిస్టుల హక్కుల కోసం, శాశ్వత పరిష్కారం కోసం తమ న్యాయపోరాటం కొనసాగుతుందని ఆయన స్పష్టం చేశారు. ఈ గడువు పొడిగింపుతో రాష్ట్రవ్యాప్తంగా ఉన్న జర్నలిస్టులు అధికారిక కార్యక్రమాలకు హాజరయ్యేందుకు, అలాగే రైల్వే, బస్సు రాయితీలు మరియు ఇతర ప్రభుత్వ సదుపాయాలు పొందేందుకు వీలు కలుగుతుంది.

న్యాయస్థానం తదుపరి విచారణను జూన్ 16, 2026కు వాయిదా వేసింది. ఆ రోజున ఈ వివాదానికి సంబంధించిన తుది నిర్ణయం వెలువడే అవకాశం ఉంది.