ప్రతి రైతుకూ ‘ఫార్మర్ ఐడీ’ తప్పనిసరి: తహసీల్దార్ అన్వర్, ఏఓ విజయచంద్ర

కేంద్ర, రాష్ట్ర ప్రభుత్వ పథకాలకు రిజిస్ట్రేషన్ ప్రామాణికం
మే 2 వరకు మండలంలో ప్రత్యేక డ్రైవ్
షాబాద్ రైతు వేదికలో అధికారుల సమీక్షా సమావేశం

షాబాద్, ఏప్రిల్ 23 : దేశంలోని ప్రతి పౌరుడికి గుర్తింపు కార్డు ఉన్నట్లే, ప్రతి రైతుకు 11 అంకెల విశిష్ట గుర్తింపు సంఖ్య (ఫార్మర్ ఐడీ) కేటాయించే ప్రక్రియను ప్రభుత్వం వేగవంతం చేసింది. షాబాద్ మండలంలోని ప్రతి రైతు ఫార్మర్ రిజిస్ట్రీలో తప్పనిసరిగా పేరు నమోదు చేసుకోవాలని తహసీల్దార్ అన్వర్, మండల వ్యవసాయ అధికారి దండెం విజయచంద్ర సూచించారు. గురువారం షాబాద్ రైతు వేదికలో ఏఈఓలు, మీ-సేవ ప్రతినిధులు, వీఆర్వోలతో నిర్వహించిన సమీక్షా సమావేశంలో వారు మాట్లాడారు.

డిజిటలైజేషన్ దిశగా వ్యవసాయ రంగం

వ్యవసాయ రంగాన్ని పూర్తిగా డిజిటలైజేషన్ చేయాలనే లక్ష్యంతో ప్రభుత్వం ఈ కార్యక్రమాన్ని చేపట్టిందని అధికారులు వివరించారు. భూమి కలిగిన ప్రతి రైతు భూ యాజమాన్య వివరాలు, వ్యక్తిగత సమాచారం ఆధారంగా ఈ రిజిస్ట్రీని రూపొందిస్తున్నట్లు తెలిపారు. దీనివల్ల రైతులకు అందే సేవల్లో పారదర్శకత పెరుగుతుందని పేర్కొన్నారు.

పథకాల లబ్ధికి రిజిస్ట్రేషన్ కీలకం

ఫార్మర్ రిజిస్ట్రీలో నమోదు చేసుకోని పక్షంలో భవిష్యత్తులో ప్రభుత్వ పథకాల లబ్ధి పొందే అవకాశం ఉండదని అధికారులు హెచ్చరించారు.

పీఎం కిసాన్: కేంద్ర ప్రభుత్వ పీఎం కిసాన్ నిధులు అందాలంటే ఈ ఐడీ తప్పనిసరి.
రాష్ట్ర పథకాలు: రాబోయే సీజన్ నుండి రైతు భరోసా, రుణమాఫీ పథకాలకు ఇది ప్రామాణికం.
కొనుగోళ్లు & రాయితీలు: ధాన్యం, మొక్కజొన్న, పత్తి కొనుగోలుతో పాటు యూరియా, ఎరువుల పంపిణీకి కూడా ఫార్మర్ ఐడీని తప్పనిసరి చేయనున్నట్లు వెల్లడించారు.

నమోదు ప్రక్రియ ఇలా..

రైతులు తమ భూ యాజమాన్య పాస్‌బుక్, వ్యక్తిగత గుర్తింపు కార్డు (ఆధార్), మరియు దానికి అనుసంధానమైన మొబైల్ నంబర్‌తో సమీపంలోని రైతు వేదికలో వ్యవసాయ విస్తరణ అధికారిని (ఏఈఓ) లేదా మీ-సేవ కేంద్రాలను సంప్రదించి నమోదు చేసుకోవాలని కోరారు. ఏప్రిల్ 23 నుండి మే 02 వరకు మండలంలో ప్రత్యేక డ్రైవ్ నిర్వహించనున్నట్లు తెలిపారు.

మండలంలో గణాంకాలు

షాబాద్ మండలంలో మొత్తం 25,938 మంది పట్టాదారు రైతులు ఉండగా, ఇప్పటివరకు 15,591 మంది నమోదు పూర్తి చేసుకున్నారు. ఇంకా 10,437 మంది రైతులు పెండింగ్‌లో ఉన్నారని, వీరందరూ గడువులోగా ప్రక్రియను పూర్తి చేయాలని అధికారులు ఆదేశించారు.

పాల్గొన్న వారు: ఈ కార్యక్రమంలో వ్యవసాయ విస్తరణ అధికారులు శివతేజ, రాజేశ్వరి, లిఖిత, గీత, గాయత్రి, గ్రామ పరిపాలన అధికారులు మరియు మీ-సేవ కేంద్రాల ప్రతినిధులు పాల్గొన్నారు.