ఆకునూరి సరిత వర్ధంతి పురస్కరించుకుని నిరుపేదలకు నిత్యవసరాల పంపిణీ

• ప్రజాసేవ వెల్ఫేర్ సొసైటీ ఆధ్వర్యంలో రెండు కుటుంబాలకు అండ

• ఆపదలో ఉన్నవారిని ఆదుకోవడమే నిజమైన సేవా నిరతి: రాజ్ కుమార్

మందమర్రి, మే 21:

సామాజిక సేవా రంగంలో నిరంతరం ముందుండే మందమర్రి ‘ప్రజాసేవ వెల్ఫేర్ సొసైటీ’ ఆధ్వర్యంలో గురువారం పట్టణంలో మానవతా దృక్పథంతో కూడిన ఉచిత నిత్యవసర వస్తువుల పంపిణీ కార్యక్రమం జరిగింది. దివంగత ఆకునూరి సరిత 5వ వర్ధంతిని పురస్కరించుకుని ఆమె స్మారకార్థం మందమర్రి 3వ జోన్ పరిధిలో అత్యంత దీనస్థితిలో నివసిస్తున్న ఎడ్ల రాజు కుటుంబానికి, అలాగే యాపిల్ ప్రాంతానికి చెందిన వృద్ధుడు సుబ్బారావు కుటుంబానికి నెలకు సరిపడా నిత్యవసర సరుకులను సొసైటీ ప్రతినిధులు అందజేశారు.

సమాచారం అందిన వెంటనే స్పందన..

ఈ సందర్భంగా ప్రజాసేవ వెల్ఫేర్ సొసైటీ జిల్లా అధ్యక్షుడు నందిపాట రాజ్ కుమార్ మాట్లాడుతూ.. 3వ జోన్‌కు చెందిన ఎడ్ల రాజు ప్రస్తుతం తీవ్ర అనారోగ్యంతో బాధపడుతున్నారని, అటు యాపిల్ ప్రాంతానికి చెందిన సుబ్బారావు వృద్ధాప్య భారంతో పాటు తీవ్ర ఆర్థిక ఇబ్బందులు ఎదుర్కొంటూ జీవనం సాగిస్తున్నారని తెలిపారు. ఈ రెండు కుటుంబాల దయనీయ పరిస్థితిని గమనించిన స్థానికులు తమ సొసైటీని సంప్రదించగా, సమాచారం అందిన వెంటనే స్పందించి నిత్యవసర వస్తువులను సమకూర్చినట్లు వివరించారు.

గతంలో కూడా ఈ కుటుంబాలకు సొసైటీ తరఫున ఆర్థిక, వస్తు సహాయం అందించామని గుర్తుచేశారు. భవిష్యత్తులోనూ ఈ కుటుంబాలకు తమ సంస్థ ఎల్లప్పుడూ అండగా ఉంటుందని భరోసా ఇచ్చారు. ఈ సేవా కార్యక్రమానికి పూర్తిగా ఆర్థిక సహకారం అందించిన ఆకునూరి నందు మరియు వారి కుటుంబ సభ్యులకు సొసైటీ తరఫున ఆయన ప్రత్యేక కృతజ్ఞతలు తెలియజేశారు.

పాల్గొన్న సొసైటీ ప్రతినిధులు:

ఈ సేవా కార్యక్రమంలో ప్రజాసేవ వెల్ఫేర్ సొసైటీ మందమర్రి పట్టణ అధ్యక్షుడు ఎండి. జావిద్ పాషా, సభ్యులు శ్రీనివాస్, దిలీప్, నందిపాట రవి, శ్రీనివాస్, అజయ్ తదితరులు పాల్గొన్నారు.