రైతులకు ఇబ్బంది కలగకుండా వర్షాకాలం ముందే చెరువుల మరమ్మతులు పూర్తి చేయాలి: ఎమ్మెల్యే డాక్టర్ ఆర్. భూపతి రెడ్డి

ధర్పల్లి మండలం ముత్యాల చెరువు పనులపై అధికారుల సమీక్ష
మ్యాప్ ద్వారా ప్రణాళికను వివరించిన నీటి పారుదల శాఖ అధికారులు
నిధుల విడుదల కోసం మంత్రి ఉత్తమ్ కుమార్ రెడ్డికి ఎమ్మెల్యే లేఖ

ధర్పల్లి/నిజామాబాద్, మే 19 :

“గత వర్షాకాలంలో దెబ్బతిన్న చెరువులు, చెక్ డ్యామ్‌ల మరమ్మతు పనులను యుద్ధప్రాతిపదికన చేపట్టాలి. రాబోయే వర్షాకాలం కంటే ముందే ఈ పనులన్నీ పూర్తయ్యేలా అధికారులు సమిష్టి కృషితో పనిచేసి రైతులకు సాగునీటి ఇబ్బందులు లేకుండా చూడాలి” అని రూరల్ శాసనసభ్యులు డాక్టర్ ఆర్. భూపతి రెడ్డి అధికారులను ఆదేశించారు.

ధర్పల్లి మండలం హొన్నాజీపేట్ గ్రామ పరిధిలోని ముత్యాల చెరువు మరమ్మతులు, ప్రొటెక్షన్ వాల్ (రక్షణ గోడ) నిర్మాణం, నియోజకవర్గంలోని చెక్ డ్యామ్‌ల పునరుద్ధరణ తదితర అంశాలపై మంగళవారం నీటి పారుదల (ఇరిగేషన్) శాఖ ఉన్నతాధికారులు ఎమ్మెల్యే భూపతి రెడ్డిని ఆయన నివాసంలో మర్యాదపూర్వకంగా కలుసుకున్నారు.

మ్యాప్ ద్వారా ప్రణాళికల వివరణ

గత 2025 వర్షాకాలంలో ముత్యాల చెరువు అలుగు, కట్ట దెబ్బతినడంతో ఆ ప్రభావం మండలంలోని వాడి, హొన్నాజీపేట గ్రామ రైతాంగంపై తీవ్రంగా పడింది. సాగునీరు వృథా కావడంతో పాటు పంటలు నష్టపోయామని, చెరువుకు తక్షణమే మరమ్మతులు చేపట్టాలని ఉభయ గ్రామాల రైతులు, గ్రామస్థులు ఎమ్మెల్యేకు విన్నవించారు. దీనిపై స్పందించిన ఎమ్మెల్యే ఆదేశాల మేరకు ఇరిగేషన్ అధికారులు క్షేత్రస్థాయి పరిశీలన జరిపారు. ఈ మేరకు రూపొందించిన సాంకేతిక ప్రణాళికలు, అంచనాలను మ్యాప్ పాయింటింగ్ ద్వారా అధికారులు ఎమ్మెల్యే భూపతి రెడ్డికి క్షుణ్ణంగా వివరించారు. చెరువు భవిష్యత్తులో దెబ్బతినకుండా ఉండేందుకు బలమైన ప్రొటెక్షన్ వాల్ నిర్మించాల్సిన అవసరాన్ని అధికారులు ఎమ్మెల్యే దృష్టికి తీసుకెళ్లారు.

మంత్రి ఉత్తమ్ కుమార్ రెడ్డికి ఎమ్మెల్యే లేఖ

అధికారుల నివేదికపై సానుకూలంగా స్పందించిన ఎమ్మెల్యే డాక్టర్ ఆర్. భూపతి రెడ్డి.. ముత్యాల చెరువు రక్షణ గోడతో పాటు నియోజకవర్గంలోని వివిధ చెక్ డ్యామ్‌ల మరమ్మతులకు అవసరమైన నిధులను తక్షణమే విడుదల చేయాలని కోరుతూ రాష్ట్ర నీటి పారుదల శాఖ మంత్రి ఎన్. ఉత్తమ్ కుమార్ రెడ్డికి తగు చర్యల నిమిత్తం లేఖ రాశారు. నిధులు మంజూరు కాగానే పనులను వేగవంతం చేయాలని అధికారులకు సూచించారు.

ఈ సమీక్షా కార్యక్రమంలో ఇరిగేషన్ శాఖ ఎస్ఈ (SE) నజీర్ హుస్సేన్, ఈఈ (EE) నరేంద్ర కుమార్, డీఈ (DE) ప్రేమ్ కుమార్, ఏఈలు (AEs) సాయినాథ్, రాంప్రసాద్ తదితర సాంకేతిక సిబ్బంది పాల్గొన్నారు.