దుగ్నేపల్లి ఎస్సీ కాలనీలో తాగునీటి కష్టాలకు చెక్: నూతన బోర్ వెల్ పనులు ప్రారంభం

ఎమ్మెల్యే గడ్డం వినోద్ వెంకటస్వామి ఆదేశాలతో సమస్యకు పరిష్కారం
మాజీ మార్కెట్ కమిటీ చైర్మన్ కారుకూరి రాంచందర్ సహకారంతో పనులు
హర్షం వ్యక్తం చేస్తూ కృతజ్ఞతలు తెలిపిన కాలనీ వాసులు

బెల్లంపల్లి, మే 19 :

బెల్లంపల్లి మండలం దుగ్నేపల్లి గ్రామపంచాయతీ పరిధిలోని ఎస్సీ కాలనీ మూడో వార్డు ప్రజల తాగునీటి కష్టాలు తీరనున్నాయి. బెల్లంపల్లి శాసనసభ్యులు గడ్డం వినోద్ వెంకటస్వామి ఆదేశాల మేరకు, బెల్లంపల్లి మున్సిపల్ మాజీ మార్కెట్ కమిటీ చైర్మన్ కారుకూరి రాంచందర్ ప్రత్యేక ఆర్థిక సహకారంతో కాలనీలో నూతన బోర్ వెల్ (బావి) తవ్వకం పనులను మంగళవారం ఘనంగా ప్రారంభించారు. దుగ్నేపల్లి గ్రామపంచాయతీ మాజీ సర్పంచ్ డోలే సురేష్ ఈ కార్యక్రమానికి ముఖ్య అతిథిగా విచ్చేసి, భూమి పూజ నిర్వహించి బోర్ వెల్ పనులను అధికారికంగా ప్రారంభించారు.

ప్రజల ముంగిటకే తాగునీరు..

ఈ సందర్భంగా మాజీ సర్పంచ్ డోలే సురేష్ మాట్లాడుతూ.. ఎస్సీ కాలనీలోని మూడో వార్డు ప్రజలు గత కొంతకాలంగా తాగునీటి కోసం తీవ్ర ఇబ్బందులు పడుతున్న విషయం ఎమ్మెల్యే గడ్డం వినోద్ వెంకటస్వామి, నాయకులు కారుకూరి రాంచందర్ దృష్టికి తీసుకెళ్లగా వారు తక్షణమే స్పందించారని తెలిపారు. గ్రామీణ ప్రాంత ప్రజలకు మౌలిక వసతులు కల్పించడమే ధ్యేయంగా కాంగ్రెస్ ప్రభుత్వం, స్థానిక ఎమ్మెల్యే కృషి చేస్తున్నారని కొనియాడారు. ఈ నూతన బోర్ వెల్ అందుబాటులోకి రావడం వల్ల కాలనీ వాసుల నీటి ఎద్దడి పూర్తిగా తొలగిపోతుందని స్పష్టం చేశారు.

నేతలకు కృతజ్ఞతలు తెలిపిన కాలనీ వాసులు

తమ సమస్యను ఆలకించి, యుద్ధప్రాతిపదికన బోర్ వెల్ పనులు ప్రారంభించేలా చొరవ చూపిన ఎమ్మెల్యే గడ్డం వినోద్ వెంకటస్వామికి, ఆర్థిక సాయం అందించిన కారుకూరి రాంచందర్‌కు వార్డు ప్రజలు, స్థానిక యువకులు పెద్ద ఎత్తున కృతజ్ఞతలు తెలియజేస్తూ ఆనందం వ్యక్తం చేశారు.

ఈ అభివృద్ధి కార్యక్రమంలో పీఏసీఎస్ (PACS) డైరెక్టర్ డోలే దేవమ్మ, కాంగ్రెస్ పార్టీ ముఖ్య నాయకులు కాసిపాక విజయ్, 3వ వార్డు సభ్యులు డోలే హరికృష్ణతో పాటు కాలనీ పెద్దలు, యువకులు, గ్రామస్థులు అధిక సంఖ్యలో పాల్గొన్నారు.