-
మణుగూరులో కార్మిక చట్టాలపై న్యాయ అవగాహన సదస్సు
-
అన్యాయం జరిగితే ధైర్యంగా కోర్టులను ఆశ్రయించండి
-
మండల న్యాయ సేవా సమితి ఆధ్వర్యంలో మేడే వేడుకలు
మణుగూరు, మే 02 
: కార్మికులకు రోజుకు ఎనిమిది గంటల పని అనేది చట్టబద్ధమైన ప్రాథమిక హక్కు అని, తమ శ్రమకు తగిన కనీస వేతనం పొందేలా ప్రతి కార్మికుడు అవగాహన కలిగి ఉండాలని మణుగూరు ఫస్ట్ క్లాస్ మేజిస్ట్రేట్ కంబపు సూరిరెడ్డి అన్నారు. అంతర్జాతీయ కార్మిక దినోత్సవం (మేడే) సందర్భంగా శుక్రవారం మణుగూరు పట్టణంలోని అంబేద్కర్ సెంటర్లో మండల న్యాయ సేవా సమితి ఆధ్వర్యంలో ‘కార్మిక చట్టాలు – హక్కులు’ అనే అంశంపై అవగాహన సదస్సు నిర్వహించారు.
హక్కుల సాధనలో రాజీ వద్దు
ఈ సదస్సుకు ముఖ్య అతిథిగా హాజరైన జడ్జి సూరిరెడ్డి మాట్లాడుతూ.. కార్మికులు తమకు సంక్రమించిన న్యాయమైన డిమాండ్లను సాధించుకోవడంలో ఎట్టి పరిస్థితుల్లోనూ రాజీ పడకూడదని సూచించారు. “పని చేసే చోట ఎక్కడైనా అన్యాయం జరిగినా, వేతనాల చెల్లింపులో యాజమాన్యాలు ఇబ్బందులకు గురిచేసినా భయపడకుండా కోర్టులను ఆశ్రయించాలి. చట్టం ఎప్పుడూ బాధితుల పక్షాన, న్యాయం పక్షాన ఉంటుంది” అని ఆయన కార్మికులకు భరోసా ఇచ్చారు. న్యాయ సేవా సమితి ద్వారా ఉచిత న్యాయ సహాయం పొందే అవకాశం కూడా ఉందని గుర్తు చేశారు.
చట్టపరమైన అంశాలపై అవగాహన
సదస్సులో పాల్గొన్న పలువురు న్యాయవాదులు కార్మికులకు వర్తించే వివిధ చట్టాలు, ప్రమాద బీమా, పని ప్రదేశాల్లో కల్పించాల్సిన సౌకర్యాల గురించి వివరించారు. ఈ కార్యక్రమంలో న్యాయవాదులు వీర మధుసూదన్, అంకం సర్వేశ్వరరావు, నిమ్మనుగోటి సావిత్రి, కందిమల్ల నరసింహారావు, కుర్మా విజయ్, వెంకటరత్నం, రామ్ మోహన్ రావు, పోశం భాస్కర్, నాగార్జున రెడ్డి, వాసవి, వాగబోయిన రమేష్ పాల్గొన్నారు.
అలాగే కోర్టు సిబ్బంది రవీందర్, వెంకటేశ్వర్లు, కానిస్టేబుల్ బుచ్చిబాబు మరియు వివిధ రంగాలకు చెందిన కార్మికులు పెద్ద సంఖ్యలో హాజరయ్యారు.
About The Author
