జైనథ్ లక్ష్మీనారాయణ సన్నిధిలో హిందూ సమ్మేళనం

సనాతన ధర్మ పరిరక్షణ ప్రతి ఒక్కరి బాధ్యత: మాజీ మంత్రి జోగు రామన్న
వేడుకగా జ్యోతి ప్రజ్వలన.. ఆధ్యాత్మికతతోనే మానసిక ప్రశాంతత

జైనథ్, ఏప్రిల్ 24 : ఆదిలాబాద్ జిల్లా జైనథ్ మండల కేంద్రంలోని చారిత్రాత్మక జై జ నారాయణుడి (లక్ష్మీనారాయణ స్వామి) సన్నిధిలో హిందూ సమ్మేళనం కార్యక్రమం అత్యంత భక్తిశ్రద్ధలతో ఘనంగా జరిగింది. ఈ ఆధ్యాత్మిక సదస్సుకు మాజీ మంత్రి జోగు రామన్న, ప్రముఖ ఆధ్యాత్మిక వేత్త యోగ నాద సరస్వతి ముఖ్య అతిథులుగా హాజరయ్యారు.

జ్యోతి ప్రజ్వలనతో ప్రారంభం

ముందుగా అతిథులు జ్యోతి ప్రజ్వలన చేసి సమ్మేళనాన్ని లాంఛనంగా ప్రారంభించారు. ఈ సందర్భంగా యోగ నాద సరస్వతి మాట్లాడుతూ.. సమాజంలో ఐక్యత, సాంస్కృతిక విలువలను కాపాడుకోవాల్సిన అవసరం ఎంతైనా ఉందని, హిందూ ధర్మ పరిరక్షణలో ప్రతి ఒక్కరూ భాగస్వాములు కావాలని ఆకాంక్షించారు.

పాశ్చాత్య సంస్కృతికి దూరంగా ఉండాలి

మాజీ మంత్రి జోగు రామన్న మాట్లాడుతూ, భారతీయ సంస్కృతి సంప్రదాయాలు ప్రపంచానికే ఆదర్శప్రాయమని కొనియాడారు. “నేటి యువత హిందూ ధర్మం పట్ల అవగాహన పెంపొందించుకోవాలి. పిల్లలు పాశ్చాత్య సంస్కృతికి బానిసలు కాకుండా చూడాల్సిన బాధ్యత తల్లిదండ్రులపై ఉంది. సనాతన విలువలే మనకు శ్రీరామరక్ష” అని పేర్కొన్నారు.

చదువు, క్రీడలతోనే ఉన్నత శిఖరాలకు..

విద్యార్థులు కేవలం ఆధ్యాత్మికతకే పరిమితం కాకుండా, చదువు మరియు క్రీడలపై ప్రత్యేక దృష్టి సారిస్తేనే ఉన్నత స్థానాలకు చేరుకోగలరని ఆయన సూచించారు. సమాజంలో శాంతి, సౌహార్దం నెలకొల్పడంలో ప్రతి పౌరుడు తన వంతు పాత్ర పోషించాలని పిలుపునిచ్చారు.

పాల్గొన్న వారు: ఈ కార్యక్రమంలో లింగారెడ్డి, పుండ్రు వెంకటరెడ్డి, గణేష్ యాదవ్, పిడుగు సామి మరియు పెద్ద సంఖ్యలో భక్తులు, హిందూ బంధువులు పాల్గొన్నారు.