బయట అభిమానుల పడిగాపులు.. మంత్రి కుమారుడికి వీవీఐపీ మర్యాదలు
Studio18 News - జాతీయం / : బెంగళూరులో జరిగిన ఆర్సీబీ విజయోత్సవ వేడుకల్లో 11 మంది మరణించడం క్రీడాలోకాన్ని దిగ్భ్రాంతికి గురిచేసింది. ఇప్పుడీ ఘటన రాజకీయంగా తీవ్ర వివాదాస్పదమైంది. ఒకవైపు ప్రభుత్వ కార్యక్రమం జరుగుతున్న విధాన సౌధ వెలుపల జరిగిన తొక్కిసలాటలో పలువురు అభిమానులు ప్రాణాలు కోల్పోగా, అదే సమయంలో కర్ణాటక మంత్రి కుమారుడు, ఆయన కుటుంబ సభ్యులు వీవీఐపీ హోదాలో కార్యక్రమానికి హాజరవడం విమర్శలకు దారితీసింది. బెంగళూరులోని విధాన సౌధలో విరాట్ కోహ్లీ పాల్గొన్న ఒక ప్రభుత్వ కార్యక్రమం జరిగింది. దీనిని వీక్షించేందుకు పెద్ద సంఖ్యలో అభిమానులు, సామాన్య ప్రజలు ఉదయం నుంచే వేదిక వెలుపల గుమిగూడారు. అయితే, కార్యక్రమ ప్రాంగణంలోకి ప్రవేశం విషయంలో తీవ్ర గందరగోళం నెలకొని, తొక్కిసలాట సంభవించింది. ఇదే కార్యక్రమానికి హాజరైన కర్ణాటక మంత్రి కుమారుడు, ఆయన కుటుంబ సభ్యులకు మాత్రం ఎటువంటి ఆటంకం లేకుండా వీవీఐపీ ప్రవేశం కల్పించారు. అంతేకాకుండా వారికి విరాట్ కోహ్లీ వెనుకనే వేదికపై ఆసీనులయ్యేందుకు ప్రత్యేక ఏర్పాట్లు చేయడం గమనార్హం. ఉదయం నుంచి ఎండలో పడిగాపులు కాస్తున్న సామాన్య ప్రజలను పట్టించుకోకుండా, మంత్రి కుటుంబానికి పెద్దపీట వేయడం పట్ల సర్వత్ర విమర్శలు వెల్లువెత్తుతున్నాయి. వేదిక వెలుపల తొక్కిసలాట జరుగుతూ అభిమానులు ప్రాణాలు కోల్పోతున్నప్పటికీ లోపల కార్యక్రమం నిరాటంకంగా కొనసాగింది. ఈ తీరు ప్రజాగ్రహానికి మరింత ఆజ్యం పోసింది. ఒకవైపు ప్రజలు ప్రాణాలతో కొట్టుమిట్టాడుతుంటే, మరోవైపు వినోద కార్యక్రమాన్ని యథావిధిగా కొనసాగించడం ప్రభుత్వ నిర్లక్ష్యానికి నిదర్శనమని పలువురు ఆరోపిస్తున్నారు. సామాన్యుల ప్రాణాలంటే ప్రభుత్వానికి ఎంత చులకన భావమో ఈ ఘటన స్పష్టం చేస్తోందని ప్రజలు మండిపడుతున్నారు. ఇలాంటి విపత్కర పరిస్థితుల్లో కూడా వీవీఐపీ సంస్కృతికి ప్రాధాన్యం ఇవ్వడంపై సామాజిక మాధ్యమాల్లోనూ తీవ్ర నిరసన వ్యక్తమవుతోంది. బాధ్యులపై చర్యలు తీసుకోవాలని, ఇలాంటి ఘటనలు పునరావృతం కాకుండా చూడాలని డిమాండ్లు వెల్లువెత్తుతున్నాయి.
Admin
Studio18 News
మరిన్ని వార్తలు
Developed By :
