హనీమూన్ జంట మిస్సింగ్: ఫోన్ లో సోనమ్ చివరిగా అత్తగారితో మాట్లాడిన మాటలు ఇవే!
Studio18 News - జాతీయం / : "అత్తయ్యా... మేం ఇప్పుడు అడవిలో ట్రెక్కింగ్ చేస్తున్నాం, ఇక్కడో జలపాతం ఉందంట, అది చూడ్డానికి వెళుతున్నాం. మళ్ళీ కాల్ చేస్తాను," ఇవి మేఘాలయలో అదృశ్యమైన సోనమ్ తన అత్తగారితో చివరిసారిగా పలికిన మాటలు. ఏకాదశి కావడంతో ఉపవాసం ఉంటున్న కోడలి యోగక్షేమాలు తెలుసుకుందామని ఫోన్ చేసిన రాజా తల్లికి, ఆ తర్వాత సోనమ్ నుంచి పిలుపు అందలేదు, ఆ జంట ఆచూకీ గల్లంతైంది. కొద్దిరోజుల తర్వాత, వైసాడాంగ్ జలపాతం సమీపంలోని లోయలో ఆమె భర్త రాజా రఘువంశీ దారుణ హత్యకు గురైన మృతదేహాన్ని కనుగొనగా, సోనమ్ ఆచూకీ ఇప్పటికీ లభించకపోవడం తీవ్ర ఆందోళన కలిగిస్తోంది. ఈ హృదయవిదారక ఘటన ఇండోర్, మేఘాలయ ప్రాంతాల్లో కలకలం రేపింది. ఇండోర్‌కు చెందిన నవ దంపతులు రాజా రఘువంశీ, సోనమ్ మే 23న హనీమూన్ కోసం మేఘాలయ వెళ్లారు. అదే రోజు వారి ఆచూకీ తెలియరాలేదు. ఆందోళన చెందిన కుటుంబ సభ్యులు పోలీసులకు ఫిర్యాదు చేయగా, జూన్ 2న వైసాడాంగ్ జలపాతం వద్ద లోయలో రాజా మృతదేహం కుళ్లిన స్థితిలో లభ్యమైంది. దంపతులు అదృశ్యం కావడానికి కొద్దిసేపటి ముందు సోనమ్‌తో చివరిసారిగా మాట్లాడిన విషయాన్ని రాజా తల్లి కన్నీటిపర్యంతమవుతూ గుర్తుచేసుకున్నారు. "మే 23న ఏకాదశి. కోడలు ఉపవాసం ఉంటుందని తెలుసు. ఎలా ఉందో కనుక్కుందామని ఫోన్ చేశాను. నడక ప్రయాణంలో ఉన్నారు కదా, ఏదైనా తినమని చెప్పాను. దానికి సోనమ్, 'విహారయాత్రకు వచ్చానని ఉపవాసం ఎలా మానేస్తాను అత్తయ్యా' అంది. అడవిలో ఒక జలపాతం చూడటానికి ట్రెక్కింగ్ చేస్తున్నామని, కాస్త ఆయాసంగా అనిపిస్తోందని, తర్వాత కాల్ చేస్తానని చెప్పింది. ఆ తర్వాత వాళ్ల నుంచి ఎలాంటి ఫోన్ రాలేదు" అని ఆమె విలపించారు. ఈ సంభాషణకు సంబంధించిన రికార్డింగ్‌ను కుటుంబ సభ్యులు పోలీసులతో పంచుకున్నారు.
Admin
Studio18 News
మరిన్ని వార్తలు
Developed By :
