శర్మిష్ఠ అరెస్టు... వెంటనే విడుదల చేయాలని ఢిల్లీ బార్ కౌన్సిల్ డిమాండ్
Studio18 News - జాతీయం / : 'ఆపరేషన్ సిందూర్' సమయంలో సామాజిక మాధ్యమంలో చేసిన వ్యాఖ్యలతో ఒక వర్గం మనోభావాలు దెబ్బతిన్నాయన్న ఆరోపణలపై కోల్ కతా న్యాయ విద్యార్థిని శర్మిష్ఠ పనోలీని పోలీసులు అరెస్టు చేయడం చర్చనీయాంశమైంది. ఈ ఘటన రాజకీయంగా కూడా పెద్ద దుమారానికి దారితీసింది. ఈ నేపథ్యంలో, శర్మిష్ఠను తక్షణమే విడుదల చేయాలని ఢిల్లీ బార్ కౌన్సిల్ డిమాండ్ చేసింది. బార్ కౌన్సిల్ ఛైర్మన్ సూర్య ప్రకాశ్ ఖత్రి ఈ విషయంపై మాట్లాడుతూ, న్యాయ విద్యను అభ్యసిస్తున్న విద్యార్థినిని పోలీసులు అరెస్ట్ చేయడాన్ని తీవ్రంగా ఖండిస్తున్నట్లు స్పష్టం చేశారు. శర్మిష్ఠ చేసిన పోస్ట్ వల్ల కొందరికి బాధ కలిగి ఉండవచ్చని, అయితే ఆమె వెంటనే ఆ పోస్ట్ను తొలగించి, క్షమాపణలు కూడా చెప్పారని గుర్తు చేశారు. అలాంటప్పుడు కూడా పోలీసులు ఈ రకమైన చర్యలు తీసుకోవడం సమంజసం కాదని సూర్య ప్రకాశ్ ఖత్రి అభిప్రాయపడ్డారు. పశ్చిమ బెంగాల్ రాష్ట్రంలో మితిమీరిన రాజకీయ ప్రేరేపిత చర్యలకు ఇది ఒక ఉదాహరణ అని అన్నారు. బాధ్యతాయుతమైన స్థానాల్లో ఉన్న పోలీసులు ఇలాంటి తొందరపాటు నిర్ణయాలు ఎలా తీసుకుంటారని ప్రశ్నించారు. వివరాల్లోకి వెళితే, భారత సైన్యం చేపట్టిన 'ఆపరేషన్ సిందూర్'పై బాలీవుడ్ ప్రముఖులు మౌనం వహించడాన్ని ప్రశ్నిస్తూ శర్మిష్ఠ మే 14న సోషల్ మీడియాలో ఒక వీడియోను పోస్ట్ చేశారు. ఈ పోస్ట్ తీవ్ర వివాదాస్పదంగా మారడంతో పాటు పెద్ద ఎత్తున విమర్శలు కూడా వెల్లువెత్తాయి. దీంతో శర్మిష్ఠ తన పోస్టులు, రీల్స్ను తొలగించి, క్షమాపణలు కోరారు. అయినప్పటికీ, పోలీసులు ఆమెను అరెస్టు చేశారు. శర్మిష్ఠ అరెస్టును ఖండిస్తూ ఆంధ్రప్రదేశ్ డిప్యూటీ ముఖ్యమంత్రి పవన్ కల్యాణ్, పశ్చిమ బెంగాల్ ప్రతిపక్ష నేత సువేందు అధికారి 'ఎక్స్' వేదికగా స్పందించారు. కోల్కతా పోలీసుల చర్య భారతదేశంలోని వాక్స్వేచ్ఛకు భంగం కలిగించే విధంగా ఉందని డచ్ దేశానికి చెందిన పార్లమెంట్ సభ్యుడు గీర్ట్ వైల్డర్స్ సైతం 'ఎక్స్'లో పోస్ట్ చేశారు. ఈ విషయంలో శర్మిష్ఠకు సహాయం చేయాలని ఆయన భారత ప్రధానమంత్రి నరేంద్ర మోదీని అభ్యర్థించారు. ఈ పరిణామాలతో శర్మిష్ఠ అరెస్ట్ వ్యవహారం జాతీయ, అంతర్జాతీయ స్థాయిలో దృష్టిని ఆకర్షిస్తోంది.
Admin
Studio18 News
మరిన్ని వార్తలు
Developed By :
