ఈశాన్యంలో జలవిలయం.. అస్సాం సిల్చార్లో 132 ఏళ్ల రికార్డు బద్దలు!
Studio18 News - జాతీయం / : ఈశాన్య భారతంలో జూన్ నెల ఆరంభంలోనే వరుణుడు ప్రతాపం చూపించాడు. అస్సాం, మణిపూర్, త్రిపుర సహా పలు రాష్ట్రాల్లో భారీ వర్షాలు, వరదలు, కొండచరియలు విరిగిపడటంతో జనజీవనం స్తంభించింది. అస్సాంలోని రెండో అతిపెద్ద నగరమైన సిల్చార్లో నిన్న (జూన్ 1న) ఏకంగా 132 ఏళ్లనాటి వర్షపాతం రికార్డు బద్దలైంది. ఈ ప్రకృతి వైపరీత్యాల కారణంగా గత మూడు రోజుల్లోనే ఈశాన్య రాష్ట్రాల్లో కనీసం 34 మంది ప్రాణాలు కోల్పోయారు. అస్సాంలోని సిల్చార్ నగరం నిన్న కుండపోత వర్షంతో తడిసి ముద్దయింది. కేవలం 24 గంటల వ్యవధిలో 415.8 మిల్లీమీటర్ల వర్షపాతం నమోదైంది. ఇది 1893 తర్వాత ఒకే రోజులో నమోదైన అత్యధిక వర్షపాతం కావడం గమనార్హం. 1893లో నమోదైన 290.3 మిల్లీమీటర్ల వర్షపాత రికార్డును తాజా వర్షం తిరగరాసింది. ఉపరితల ఆవర్తనాలు, అల్పపీడన ద్రోణుల కలయిక వల్లే ఈ అస్థిర వాతావరణ పరిస్థితులు నెలకొన్నాయని భారత వాతావరణ శాఖ (ఐఎండీ) వెల్లడించింది. ముఖ్యంగా తూర్పు ఉత్తరప్రదేశ్ నుంచి విస్తరించి ఉన్న ద్రోణి కారణంగా మధ్య అస్సాం నుంచి అరుణాచల్ ప్రదేశ్ వరకు తీవ్రమైన వాతావరణ కల్లోలం ఏర్పడిందని అధికారులు తెలిపారు. ఇతర ఈశాన్య రాష్ట్రాల్లో పరిస్థితి గత మూడు రోజులుగా ఈశాన్య రాష్ట్రాలైన అస్సాం, మణిపూర్, త్రిపుర, సిక్కిం, అరుణాచల్ ప్రదేశ్ తదితర ప్రాంతాల్లో వరదలు, కొండచరియలు విరిగిపడిన ఘటనల్లో కనీసం 34 మంది మరణించారు. మిజోరంలో మే 31న సాధారణం కంటే ఏకంగా 1102 శాతం అధిక వర్షపాతం నమోదైంది. మేఘాలయలో మే 28 నుంచి జూన్ 1 వరకు ఐదు రోజులుగా ఎడతెరిపి లేకుండా వర్షాలు కురుస్తున్నాయి. సోహ్రా (చిరపుంజి), మాసిన్రామ్లలో వరుసగా 796 మి.మీ., 774.5 మి.మీ. చొప్పున వర్షపాతం నమోదైంది. ఖ్లీహ్రియాత్, ఆర్కేఎం సోహ్రా, పైనూర్స్లా వంటి ఇతర ప్రాంతాల్లో కూడా 500 మి.మీ.కు పైగా వర్షం కురిసింది. మే 30న ఆర్కేఎం సోహ్రాలో ఒక్కరోజే అత్యధికంగా 378.4 మి.మీ. వర్షం పడగా, మొత్తం ఐదు రోజుల్లో అక్కడ 993.6 మి.మీ. వర్షపాతం నమోదైంది. అలాగే మాసిన్రామ్, పైనూర్స్లాలలో కూడా మే 30న ఒక్కరోజే 250 మి.మీ.కు పైగా వర్షం కురిసింది. మేఘాలయలోని 10 జిల్లాల్లో ఆకస్మిక వరదలు, కొండచరియలు విరిగిపడ్డాయి. త్రిపురలో ఆకస్మిక వరదల కారణంగా 10,000 మందికి పైగా ప్రజలు తీవ్ర ఇబ్బందులు ఎదుర్కొంటున్నారు. మణిపూర్లో నదులు ఉప్పొంగడం, కట్టలు తెగిపోవడంతో వరదలు సంభవించి, 19,000 మందికి పైగా ప్రజలు ప్రభావితమయ్యారు. సుమారు 3,365 ఇళ్లు దెబ్బతిన్నట్లు అధికారులు తెలిపారు. ప్రభావిత ప్రాంతాల్లో సహాయక చర్యలు కొనసాగుతున్నాయి.
Admin
Studio18 News
మరిన్ని వార్తలు
Developed By :
