కారు వెనుక నక్కి సల్మాన్ ఖాన్ ఇంట్లోకి దూరే యత్నం.. వ్యక్తి అరెస్టు
Studio18 News - సినిమా, టీవీ & ఓటీటీ / : బాలీవుడ్ ప్రముఖ నటుడు సల్మాన్ ఖాన్ నివాసంలో మరోసారి భద్రతా వైఫల్యం చర్చనీయాంశమైంది. సల్మాన్ ఖాన్ను కలవాలనే కారణంతో ఓ వ్యక్తి ఆయన ఉంటున్న గెలాక్సీ అపార్ట్మెంట్స్లోకి చొరబడ్డాడు. ఈ ఘటన రెండు రోజుల క్రితం జరగ్గా, ఆలస్యంగా వెలుగులోకి వచ్చింది. నిందితుడిని జితేంద్ర కుమార్ సింగ్గా గుర్తించిన పోలీసులు, అతడిని అదుపులోకి తీసుకుని విచారిస్తున్నారు. పోలీసులు వెల్లడించిన వివరాల ప్రకారం, ఈ నెల 20వ తేదీ ఉదయం సుమారు 10 గంటల సమయంలో జితేంద్ర కుమార్ సింగ్, సల్మాన్ ఖాన్ ఇంటి పరిసరాల్లో అనుమానాస్పదంగా తిరుగుతుండటాన్ని భద్రతా సిబ్బంది గమనించారు. అతడిని అక్కడి నుంచి వెళ్లిపోవాలని సూచించగా, ఆగ్రహంతో తన వద్ద ఉన్న ఫోన్ను విసిరేశాడు. అదే రోజు సాయంత్రం మళ్లీ సల్మాన్ ఇంటి వద్ద ప్రత్యక్షమయ్యాడు. ఈసారి గెలాక్సీ అపార్ట్మెంట్లోకి వెళుతున్న మరో నివాసితుడి కారు వెనుక నక్కి, లోపలికి ప్రవేశించేందుకు ప్రయత్నించాడు. అయితే, అప్రమత్తంగా ఉన్న భద్రతా సిబ్బంది అతడిని వెంటనే అడ్డుకుని, బాంద్రా పోలీసులకు సమాచారం అందించారు. పోలీసులు ఘటనా స్థలానికి చేరుకుని జితేంద్రను అదుపులోకి తీసుకున్నారు. విచారణలో తాను ఛత్తీస్గఢ్ నుంచి వచ్చానని, సల్మాన్ ఖాన్ను కలవడం కోసమే ఇలా చేశానని జితేంద్ర చెప్పినట్లు పోలీసులు తెలిపారు. పోలీసులు తనను కలవడానికి అనుమతించకపోవడంతోనే కారు వెనుక దాక్కుని లోపలికి వెళ్లే ప్రయత్నం చేశానని అంగీకరించాడు. నిందితుడిపై కేసు నమోదు చేసి అరెస్ట్ చేసినట్లు పోలీసులు వెల్లడించారు.
Admin
Studio18 News
మరిన్ని వార్తలు
Developed By :
