పాక్ తో ఉద్రిక్తతలు... 8 వేల అకౌంట్లను బ్లాక్ చేయాలన్న భారత్... తీవ్ర అసంతృప్తి వ్యక్తం చేసిన ఎక్స్
Studio18 News - జాతీయం / : పాక్ తో ఉద్రిక్తతల నేపథ్యంలో... ప్రముఖ సోషల్ మీడియా వేదిక ఎక్స్ లో వేలాది ఖాతాలను నిలిపివేయాలంటూ భారత కేంద్ర ప్రభుత్వం ఆదేశాలు జారీ చేసింది. స్థానిక చట్టాలను ఉల్లంఘిస్తున్నాయన్న కారణంతో 8,000కు పైగా ఖాతాలను బ్లాక్ చేయాలని ప్రభుత్వం ఆదేశించగా, ఎక్స్ యాజమాన్యం ఈ ఆదేశాలను పాటిస్తూనే, వీటిపై తీవ్ర అభ్యంతరాన్ని వ్యక్తం చేసింది. ఇది భావప్రకటనా స్వేచ్ఛను హరించడమేనని, సెన్సార్‌షిప్‌తో సమానమని ఆరోపించింది. ఎలాన్ మస్క్ నేతృత్వంలోని ఎక్స్... భారత ప్రభుత్వం నుంచి తమకు కార్యనిర్వాహక ఆదేశాలు అందాయని అధికారికంగా వెల్లడించింది. ఈ ఆదేశాల ప్రకారం, భారతదేశంలో 8,000కు పైగా ఖాతాలకు యాక్సెస్‌ను నిరోధించాలని ప్రభుత్వం కోరిందని ఎక్స్ గ్లోబల్ గవర్నమెంట్ అఫైర్స్ విభాగం ఒక ప్రకటనలో తెలిపింది. ఈ ఖాతాలలో కొన్ని అంతర్జాతీయ వార్తా సంస్థలకు చెందినవి మరియు పలువురు ప్రముఖ ఎక్స్ వినియోగదారులవి కూడా ఉన్నాయని పేర్కొంది. ప్రభుత్వ ఆదేశాలకు అనుగుణంగా, నిర్దేశిత ఖాతాలను భారతదేశంలో నిలిపివేసే ప్రక్రియను ప్రారంభించినట్లు ఎక్స్ తెలిపింది. అయితే, ప్రభుత్వ డిమాండ్లతో తాము ఏకీభవించడం లేదని స్పష్టం చేసింది. "ఖాతాలను పూర్తిగా నిరోధించడం అనవసరం అని భావిస్తున్నాం. ఇది ప్రస్తుత మరియు భవిష్యత్ కంటెంట్‌పై సెన్సార్‌షిప్ విధించడమే అవుతుంది. ఇది ప్రాథమిక హక్కయిన భావప్రకటనా స్వేచ్ఛకు విరుద్ధం" అని ఎక్స్ తన ప్రకటనలో పేర్కొంది. చాలా సందర్భాలలో, ఏయే ఖాతాల పోస్టులు భారతీయ చట్టాలను ఉల్లంఘించాయో ప్రభుత్వం స్పష్టంగా పేర్కొనలేదని ఎక్స్ తెలిపింది. గణనీయమైన సంఖ్యలో ఖాతాలకు సంబంధించి, వాటిని నిరోధించడానికి ఎలాంటి ఆధారాలు లేదా సమర్థనలు తమకు అందలేదని కూడా వెల్లడించింది. తమ విధానాలకు అనుగుణంగా ప్రభావితమైన వినియోగదారులకు ఈ చర్యల గురించి తెలియజేశామని కంపెనీ వివరించింది. ఈ ఆదేశాలను పాటించకపోతే భారీ జరిమానాలతో పాటు, కంపెనీ స్థానిక ఉద్యోగులకు జైలు శిక్ష కూడా విధించే అవకాశం ఉందని ప్రభుత్వం హెచ్చరించినట్లు ఎక్స్ తెలిపింది. అయినప్పటికీ, భారతదేశంలో తమ వేదికను అందుబాటులో ఉంచడం భారతీయులకు సమాచారాన్ని పొందేందుకు చాలా కీలకమని తాము భావిస్తున్నట్లు పేర్కొంది. పారదర్శకత కోసం ఈ కార్యనిర్వాహక ఆదేశాలను బహిర్గతం చేయడం చాలా అవసరమని, అయితే చట్టపరమైన పరిమితుల కారణంగా ప్రస్తుతం వాటిని ప్రచురించలేకపోతున్నామని ఎక్స్ వివరించింది. ఈ విషయంలో తమకు అందుబాటులో ఉన్న అన్ని చట్టపరమైన మార్గాలను అన్వేషిస్తున్నట్లు ఎక్స్ ప్రకటించింది. కాగా, బ్లాక్ చేయాలన్న ఉత్తర్వుల వల్ల ప్రభావితమైన వినియోగదారులు న్యాయస్థానాలను ఆశ్రయించవచ్చని, భారత ప్రభుత్వ సైబర్ లా విభాగాన్ని కూడా సంప్రదించవచ్చని ఎక్స్ సూచించింది.
Admin
Studio18 News
మరిన్ని వార్తలు
Developed By :
