కొనసాగుతున్న పాక్ కవ్వింపు చర్యలు.. మహిళ మృతి
Studio18 News - జాతీయం / : భారత్, పాకిస్థాన్ మధ్య సరిహద్దు ఉద్రిక్తతలు కొనసాగుతున్నాయి. భారత్ ఇటీవల చేపట్టిన ‘ఆపరేషన్ సిందూర్’ అనంతరం ప్రతీకార చర్యలకు దిగిన పాకిస్థాన్ గురువారం జమ్మూకశ్మీర్‌లోని ఉరీ సెక్టార్‌లో కాల్పులకు తెగబడింది. ఈ ఘటనలో ఒక మహిళ ప్రాణాలు కోల్పోగా, మరొకరు తీవ్రంగా గాయపడ్డారు. పలు భారత భూభాగాలపై డ్రోన్లు, క్షిపణులతో దాడి చేసేందుకు పాకిస్థాన్ చేసిన యత్నాలను భారత రక్షణ దళాలు సమర్థవంతంగా తిప్పికొట్టాయి. ఉత్తర కశ్మీర్‌లోని బారాముల్లా జిల్లా పరిధిలోని ఉరీ ప్రాంతంలో ఈ విషాద ఘటన చోటుచేసుకుంది. అధికారుల వివరాల ప్రకారం.. రాజర్‌వాణి నుంచి బారాముల్లాకు వెళ్తున్న వాహనం మొహురా సమీపంలోకి రాగానే, పాకిస్థాన్ వైపు నుంచి దూసుకొచ్చిన ఒక షెల్ దానిని బలంగా తాకింది. ఈ దుర్ఘటనలో రాజర్‌వాణి గ్రామానికి చెందిన నర్గీస్ బేగం అక్కడికక్కడే మరణించారు. అదే వాహనంలో ప్రయాణిస్తున్న హఫీజా తీవ్ర గాయాలపాలయ్యారు. ఆమెను వెంటనే బారాముల్లాలోని ప్రభుత్వ వైద్య కళాశాల ఆసుపత్రికి తరలించి చికిత్స అందిస్తున్నారు. కొన్నిగంటల విరామం తర్వాత ఉరీ సెక్టార్‌లో పాకిస్థాన్ సైన్యం మరోసారి కాల్పులు ప్రారంభించినట్లు తెలిసింది. కుప్వారా జిల్లాలోని కెరాన్ సరిహద్దు పట్టణంలో పాక్ షెల్లింగ్ కారణంగా ఒక ఇల్లు ధ్వంసమైంది. భారత్ చేపట్టిన ‘ఆపరేషన్ సిందూర్’కు ప్రతిస్పందనగా పాకిస్థాన్ గురువారం జమ్మూ, పఠాన్‌కోట్, ఉధంపూర్ వంటి కీలక ప్రాంతాలపై డ్రోన్లు, క్షిపణులతో దాడులు చేసేందుకు ప్రయత్నించింది. అయితే, భారత్ అత్యాధునిక ఎస్-400 రక్షణ వ్యవస్థలు ఈ దాడులను సమర్థవంతంగా నిలువరించాయి. నియంత్రణ రేఖ (ఎల్‌వోసీ), అంతర్జాతీయ సరిహద్దు వెంబడి ఉధంపూర్, సాంబా, జమ్మూ, అఖ్నూర్, నౌగ్రోటా, పఠాన్‌కోట్ తదితర ప్రాంతాలపైకి పాకిస్థాన్ పంపిన 50కి పైగా డ్రోన్లను భారత సైనిక దళాలు విజయవంతంగా కూల్చివేశాయి. ఈ కౌంటర్-డ్రోన్ ఆపరేషన్‌లో ఎల్-70 గన్స్, జడ్‌యూ-23ఎంఎం, షిల్కా వంటి వ్యవస్థలు అత్యాధునిక ఆయుధాలను ఉపయోగించినట్లు సైనిక వర్గాలు వెల్లడించాయి. రాజస్థాన్‌లోని జైసల్మేర్ జిల్లా రామ్‌గఢ్‌లోని బీఎస్ఎఫ్ క్యాంపుపై ఉదయం 4:30 నుంచి 5:30 గంటల మధ్య పాకిస్థాన్ చేసిన మరో డ్రోన్ దాడి యత్నాన్ని కూడా రక్షణ వ్యవస్థలు భగ్నం చేశాయి.
Admin
Studio18 News
మరిన్ని వార్తలు
Developed By :
