Anaganaga Oka Raju: బాక్సాఫీస్ వద్ద నవీన్ పోలిశెట్టి హవా.. 100 కోట్ల క్లబ్లో 'అనగనగా ఒక రాజు'
Studio18 News - సినిమా, టీవీ & ఓటీటీ / : సంక్రాంతి బరిలో సత్తా చాటిన 'అనగనగా ఒక రాజు' కేవలం ఐదు రోజుల్లోనే రూ. 100 కోట్ల గ్రాస్ వసూళ్లు యూఎస్లో 1 మిలియన్ డాలర్లు.. హ్యాట్రిక్ కొట్టిన నవీన్ క్లీన్ కామెడీతో ఫ్యామిలీ ఆడియన్స్ను ఆకట్టుకుంటున్న సినిమా కంటెంట్ బలంతో బాక్సాఫీస్ను షేక్ చేస్తున్న నవీన్ పోలిశెట్టి యంగ్ హీరో నవీన్ పోలిశెట్టి బాక్సాఫీస్ వద్ద మరోసారి తన సత్తా చాటారు. ఆయన కథానాయకుడిగా నటించిన 'అనగనగా ఒక రాజు' చిత్రం కేవలం ఐదు రోజుల్లోనే రూ. 100 కోట్ల క్లబ్లో చేరి సంచలనం సృష్టించింది. సంక్రాంతి కానుకగా ఈ నెల 14న విడుదలైన ఈ సినిమా, కంటెంట్ ఉన్న చిత్రాలకు ప్రేక్షకులు ఎప్పుడూ బ్రహ్మరథం పడతారని మరోసారి రుజువు చేసింది. స్టార్డమ్ కంటే కథకే ప్రాధాన్యత ఇచ్చే నవీన్, ఈ చిత్రంతో తన మార్కెట్ను అగ్రస్థాయికి తీసుకెళ్లారు. తొలి రోజు నుంచే పాజిటివ్ టాక్తో దూసుకెళ్లిన ఈ చిత్రం వసూళ్లలోనూ అదే జోరు చూపించింది. మొదటి రోజే రూ. 22 కోట్ల గ్రాస్ సాధించి ట్రేడ్ వర్గాలను ఆశ్చర్యపరిచింది. కేవలం మూడు రోజుల్లో రూ. 61.1 కోట్లు రాబట్టిన ఈ సినిమా, ఐదు రోజులు పూర్తయ్యేసరికి రూ. 100.2 కోట్ల గ్రాస్ వసూలు చేసినట్టు నిర్మాణ సంస్థ సితార ఎంటర్టైన్మెంట్స్ అధికారికంగా ప్రకటించింది. పెద్ద సినిమాల పోటీ మధ్యలోనూ నవీన్ సినిమా ఈ స్థాయిలో వసూళ్లు సాధించడం విశేషం. క్లీన్ కామెడీ, కుటుంబ ప్రేక్షకులను ఆకట్టుకునే భావోద్వేగాలతో దర్శకుడు మారి ఈ చిత్రాన్ని తెరకెక్కించిన తీరుపై ప్రశంసలు వెల్లువెత్తుతున్నాయి. ముఖ్యంగా నవీన్ పోలిశెట్టి తనదైన కామెడీ టైమింగ్, డైలాగ్ డెలివరీతో సినిమాకు ప్రాణం పోశారని ప్రేక్షకులు అభిప్రాయపడుతున్నారు. 'ఇదే అసలైన పండగ సినిమా' అంటూ ఫ్యామిలీ ఆడియన్స్ థియేటర్ల నుంచి బయటకు వస్తుండటం ఈ సినిమా విజయానికి నిదర్శనంగా నిలుస్తోంది. ఓవర్సీస్లోనూ 'రాజు' గర్జన స్వదేశంలోనే కాకుండా ఓవర్సీస్లోనూ 'రాజు' గర్జన కొనసాగుతోంది. ముఖ్యంగా యూఎస్ మార్కెట్లో ఈ చిత్రం 1 మిలియన్ డాలర్ల వసూళ్లను అధిగమించింది. దీంతో 'జాతి రత్నాలు', 'మిస్ శెట్టి మిస్టర్ పోలిశెట్టి' చిత్రాల తర్వాత వరుసగా మూడోసారి 1 మిలియన్ డాలర్ క్లబ్లో చేరిన సినిమాగా నిలిచింది. ఈ హ్యాట్రిక్ విజయంతో అమెరికాలో నవీన్ పోలిశెట్టి తనకంటూ ఓ ప్రత్యేకమైన మార్కెట్ను సృష్టించుకున్నారు. కథ, పాత్రల బలాన్ని నమ్ముకుని సినిమాలు చేసే నవీన్, తన విజయపరంపరను కొనసాగిస్తున్నారు.
Admin
Studio18 News
మరిన్ని వార్తలు
Developed By :
