అమరావతికి నిధులు ఇవ్వొద్దని సీఎం లేఖ రాస్తే… రూ.1,000 కోట్లివ్వమని అధికారులు అడిగారట

తెలుగు రాష్ట్రాల మధ్య నెలకొన్న విభజన సమస్యల పరిష్కారం కోసం ఇరు రాష్ట్రాల ప్రతినిధులతో కేంద్ర ప్రభుత్వం జరుపుతున్న చర్చల అజెండాలో ఇటీవలే ఏపీ రాజధాని అంశం చేరిన సంగతి తెలిసిందే. గత నుల 27న కేంద్ర హోం శాఖ కార్మదర్శి అజయ్ భల్లా నేతృత్వంలో జరిగిన చర్చల్లో ఈ అంశానికి తొలిసారి చోటు దక్కింది. అయితే ఆ సమావేశంలో చాలా అంశాలపై చర్చలు జరిగినా… ఏ ఒక్క అంశంపై కూడా నిర్ణయం తీసుకోకుండానే సమావేశం ముగిసింది. ఈ క్రమంలో ఇరు రాష్ట్రాలతో ఈ నెల 23న మరోమారు భేటీ కావాలని కేంద్రం నిర్ణయించింది. ఈ మేరకు మంగళవారం అజయ్ భల్లా నుంచి ఇరు రాష్ట్రాలకు సమాచారం అందింది.

ఈ నేపథ్యంలో  ఏపీ రాజధాని అమరావతి నిర్మాణానికి కేంద్రం నుంచి విడుదల కావాల్సిన విషయంలో గత నెలలో జరిగిన సమావేశంలో ప్రస్తావనకు వచ్చిన ఓ కీలక విషయం తాజాగా వెలుగులోకి వచ్చింది. అమరావతి నిర్మాణానికి రూ.1,000 కోట్లు ఇవ్వాలని గత సమావేశంలో కేంద్రాన్ని ఏపీ అధికారులు కోరారట. అయితే ఈ సమావేశానికి హాజరైన కేంద్ర ఆర్థిక మంత్రిత్వ శాఖ అధికారులు ఏపీ అధికారుల ప్రతిపాదనపై విస్మయం వ్యక్తం చేశారట. ఏపీ రాజధాని అమరావతి నిర్మాణానికి నిధులేమీ ఇవ్వవద్దంటూ ఏపీ సీఎం కార్యాలయం నుంచి లేఖ వచ్చిందని… స్వయంగా సీఎం రాజధాని నిర్మాణానికి నిధులు ఇవ్వవద్దంటూ ఉంటే… అధికారులు నిధులు ఎలా అడుగుతారని ఆ శాఖ అధికారులు ప్రశ్నించారట. అంతేకాకుండా ఇప్పటికే రాజధాని నిర్మాణానికి రూ.1,500 కోట్లు ఇచ్చినట్లు కేంద్రం ఆ సమావేశంలో వెల్లడించింది.